Burynǵy vıtse-mınıstr Erlan Qojaǵapanovqa qatysty sot tergeýi aıaqtaldy

ASTANA. KAZINFORM – Astana qalasynyń qylmystyq ister jónindegi aýdanaralyq soty burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń bas dırektory Lázzat Kókkózovanyń ústinen qozǵalǵan isti qaraýdy aıaqtady. Sot otyrysynda tergeýdiń aıaqtalǵanyn sýdıa habarlady. Sot jaryssózderi 2 mamyr kúni tústen keıin bastalady.

— Sot tergeýdiń aıaqtalǵanyn jarııalaıdy, endi sot jaryssózderine kóshemiz, — dedi sýdıa.
Búgingi otyrysta Erlan Qojaǵapanov pen Lázzat Kókkózovanyń advokattary birneshe ótinish bildirdi. Atap aıtqanda, burynǵy vıtse-mınıstrdiń qorǵaýshylary bultartpaý sharasyn úıqamaqqa ózgertýdi surady. Alaıda sot ol ótinishti qanaǵattandyrmady.
Sondaı-aq atalǵan is boıynsha aıyptalýshy Lázzat Kókkózovanyń qorǵaýshylary 2018 jyly Qazaqstan men Reseı forýmyn uıymdastyrý men ótkizýge jumsalǵan shyǵyndar týraly elordalyq baǵalaýshylar palatasynyń maman esebin dálel retinde jaramsyz dep tanýdy talap etti.

Eske salsaq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady. 

Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan.

Bıyl naýryzdyń sońynda Antıkor atalǵan is boıynsha tergeý amaldary aıaqtalǵanyn habarlady. Sondaı-aq sot qorǵaýshy jáne aıyptaýshy taraptyń ótinishin qarastyrǵannan keıin qylmystyq is boıynsha elordalyq baǵalaýshylar palatasynyń mamanyn tartý týraly qaýly shyǵardy. 

Kezekti sot barysynda mamandar 2018 jyldaǵy forýmdy uıymdastyrý jáne ótkizý úshin usynylǵan taýarlar men qyzmetterdiń naryqtyq qunyn baǵalaıtyny aıtyldy. 

Keıin Erlan Qojaǵapanovtyń isi boıynsha 2018 jylǵy forýmǵa jumsalǵan shyǵyndy tekseretin baǵalaýshy taǵaıyndaldy. 

Sondaı-aq sot otyrysynda burynǵy vıtse-mınıstrdiń advokaty qylmystyq isti toqtatýdy suraǵan edi.