Burynǵy vıtse-mınıstr Erlan Qojaǵapanovǵa qatysty sot úkimi shyqty

ASTANA. KAZINFORM — Búgin Astana qalasynyń qylmystyq ister jónindegi aýdanaralyq soty burynǵy Mádenıet jáne sport vıtse-mınıstri Erlan Qojaǵapanov pen SUCCESS K agenttiginiń bas dırektory Lázzat Kókkózovaǵa qatysty is boıynsha úkim shyǵardy.

Sot úkimi boıynsha E. Qojaǵapanov úsh jylǵa bas bostandyǵynan aıyryldy. Sonymen qatar oǵan memlekettik qyzmette jumys isteýine ómir boıyna tyıym salynyp, memlekettik nargradalardan aıyrý týraly sheshim shyǵaryldy. Qamaýda bolǵan ýaqyty jalpy jaza merziminde eskeriledi. 

Al Lázzat Kókkózova bes jylǵa bas bostandyǵynan aıyryldy. Onyń da qamaýda otyrǵan ýaqyty jaza merzimin esepteý kezinde eskerildi. 

Sot Týrızm jáne sport mınıstrliginiń múlikti óteý týraly talap-aryzyn ishinara qanaǵattandyrdy. Bul rette, Erlan Qojaǵapanovtan keltirilgen shyǵyndy óndirý týraly talap qanaǵattandyrylmady. Al Lázzat Kókkózovaǵa 1 mlrd teńgeden astam materıaldyq shyǵyndy óteý mindeti júkteldi.

Sýdıa Qanat Tobaǵalıulynyń túsiniktemesine qaraǵanda, E. Qojaǵapanov Mádenıet jáne sport vıtse-mınıstri bola tura, qyzmet babyn paıdalanyp, merdiger uıymǵa lobbı jasaǵan. Bul turǵyda joǵarylatyp kórsetilgen shyǵyndar smetasyn bekitken, ıaǵnı bul jaǵdaı bıýdjetke asa iri kólemde zalal keltirgen. Al L. Kókkózova jasandy túrde joǵarylatylǵan shyǵyndar smetasyn usyndy. Bul rette, forýmdy uıymdastyrýǵa jáne ótkizýge bekitilgen 2,9 mlrd teńgeniń 1 mlrd 9,9 mln teńgesi jymqyrylyp, memleketke asa iri kólemde zalal keltirildi.

Eske salaıyq, byltyr 1 naýryzda Sybaılas jemqorlyqqa qarsy qyzmet Mádenıet jáne sport eks-vıtse-mınıstrin aýyr jemqorlyq qylmys jasady degen kúdik boıynsha ustady.

Antıkordyń aqparatynsha, ol 2018 jyly Petropavl qalasynda Qazaqstan Respýblıkasy men Reseı Federatsııasynyń XV óńiraralyq yntymaqtastyq forýmynyń kórmesin uıymdastyrý boıynsha shart jasasýdy qoldaǵan. 

Bıyl naýryzdyń sońynda Antıkor atalǵan is boıynsha tergeý amaldary aıaqtalǵanyn habarlady. Sondaı-aq sot qorǵaýshy jáne aıyptaýshy taraptyń ótinishin qarastyrǵannan keıin qylmystyq is boıynsha elordalyq baǵalaýshylar palatasynyń mamanyn tartý týraly qaýly shyǵardy. 

Kezekti sot barysynda mamandar 2018 jyldaǵy forýmdy uıymdastyrý jáne ótkizý úshin usynylǵan taýarlar men qyzmetterdiń naryqtyq qunyn baǵalaıtyny aıtyldy.

Keıin Erlan Qojaǵapanovtyń isi boıynsha 2018 jylǵy forýmǵa jumsalǵan shyǵyndy tekseretin baǵalaýshy taǵaıyndaldy. 

Sondaı-aq sot otyrysynda burynǵy vıtse-mınıstrdiń advokaty qylmystyq isti toqtatýdy suraǵan edi. 

2 mamyrda sýdıa burynǵy vıtse-mınıstr Erlan Qojaǵapanovqa qatysty sot tergeýi aıaqtalǵanyn habarlady. 

Artynsha E. Qojaǵapanov isine qatysty sot tergeýi qaıta jalǵasty.

Bıyl 5 mamyrda prokýror burynǵy vıtse-mınıstr Erlan Qojaǵapanovqa 7 jyl jaza surady.