Burynǵy Ulttyq ǵylym akademııasynyń memleket aldynda qaryzy joq — komıtet

ASTANA. KAZINFORM — Ǵylym jáne joǵary bilim mınıstrligi Ǵylym komıtetiniń tóraǵasy Ǵalymjan Janqýatov taratylǵan «Ulttyq ǵylym akademııasy respýblıkalyq» qoǵamdyq birlestiginiń akademıkteri Prezıdent janyndaǵy UǴA quramyna alynyp jatqanyn aıtty.

— Qazirgi tańda burynǵy ǵylym akademııasynyń 150 adamy jańa akademııaǵa ótti. Jalpy jınalys retinde ótkizilgen jıynda ekijaqty sheshim shyǵaryldy, ıaǵnı jumys osy baǵytta, jospar boıynsha júrip jatyr. Negizi buryn akademııaǵa 210 adam múshe bolǵan. Onyń 10-y aldyn ala ótken. Endi 150 adam ótip jatyr dedik. Qalǵan 50 adamdy qabyldaý da osy baǵytta júredi. Olardyń bárin túgel ótkize me, álde qandaı da bir krıterıımen iriktep ala ma, ony biz sheshpeımiz. Ony jańadan qurylǵan akademııanyń ózi sheshedi, — dedi ol.

Komıtet basshysy burynǵy akademııa is júzinde de, qujat júzinde de tolyǵymen taratylǵanyn aıtady.

— Qazir eski akademııa tolyǵymen taratyldy. Tolyǵymen salyq organdaryna qujattaryn tapsyrdy. Sondyqtan eski akademııanyń moınynda eshqandaı bereshek qalǵan joq, — dedi Ǵalymjan Janqýatov.

Eske salsaq, 28 naýryzda Murat Jurynov prezıdenti bolǵan Almatydaǵy Ulttyq ǵylymı akademııa ózin-ózi taratý týraly sheshim qabyldaǵan bolatyn.