Burynǵy sýdıa Jolmanovanyń isi: jábirlenýshiler nesıe alyp, qaryz bolyp qalǵan
ALMATY. KAZINFORM — Almatyda Medeý aýdandyq sotynyń burynǵy sýdıasy Svetlana Jolmanovanyń isi boıynsha suraq-jaýap alý kezinde jábirlenýshiler qalaı aldanyp qalǵandaryn aıtty.
Búgin is boıynsha sot otyrysyna 10 jábirlenýshi qatysty. Aıtýlarynsha, Jolmanova olardan birden birneshe bankten nesıe alyp berýdi ótingen. Keıin ústine aqsha qosyp qaıtarýǵa nemese turmystyq jaǵdaıyn jaqsartýǵa kómektesemiz dep ýáde etken.
Sottalýshy óz menshiginde shıpajaı baryn alǵa tartyp jáne ártúrli tenderge qatysqandyqtan, olardy qaıtara alatynyna sendirgen.
– Svetlana Jolmanovany on jyldan beri tanımyn. Ol kórshimniń jaqyn dosy bolatyn. 2023 jyly ol aqshalaı kómek surap, nesıe alýdy surady. Aqshany kómekshisi Uldana arqyly berdim. Barlyǵy 7 mln teńge, - deıdi jábirlenýshi G.Shahmanova.
Sulýlyq salonynda jumys istegen taǵy bir jábirlenýshi G.Ergeshovanyń aıtýynsha, Svetlana Jolmanova, anasy men kómekshileri onyń turaqty klıentteri bolǵan. 2022 jyldyń tamyz aıynda jábirlenýshi Jolmanovaǵa nesıa alyp bergen. Ol ýáde etkendeı ózi tólep júrgen. Keıin onyń kómekshisi Ergeshovany taǵy 1,3 mln teńge alyp berýge kóndirgen.
Sóz alǵan jábirlenýshilerdiń barlyǵy derlik sottalýshy Svetlana Jolmanovany 10 jyldan beri jeke tanıtyn jáne onyń sýdıa ekenin bilgen.
Zardap shekkenderdiń arasynda onyń dostary, kórshileri, tanystary men áriptesteri bar. Sondyqtan olar oǵan senip, eshqandaı túbirtek talap etpegen.
Sózderinshe, aıyptalýshy shynymen de alǵashqy aılardaǵy qaryzdardy tólegen, biraq keıin olardy elemegen.
Zardap shekkenderdiń biri D.Moljigitova Jolmanovany mektep kezinen biletinin, ekeýi bir mektepte jáne bir ýnıversıtette oqyǵanyn aıtty.
Jábirlenýshi sotta hatshy bolyp jumys istegen.
– Men sottan ketkennen keıin jaqyn aralastyq. Stýdenttik kezden jaqsy biletin Janar Baıbekpen birge jaýapkershiligi shekteýli seriktestigi bar ekenin aıtty. 2021 jyly meni páterimdi kepilge qoıýǵa kóndirdi, ol bul meniń jalǵyz baspanm ekenin jáne 80 jastaǵy anam men balam baryn bildi, - deıdi jábirlenýshi D.Moljigitova.
Osylaısha, Jolmanova nesıe sharty boıynsha páterin jeke kredıtorlarǵa kepilge qoıǵan. Jábirlenýshiniń aıtýynsha, Jolmanova áli kúnge deıin ýáde etken aqshasyn qaıtarmaı, páterdi kepilden shyǵarmaǵan. Endi jábirlenýshi páterinen aıyrylýy múmkin, sebebi nesıe berýshi 137 mln teńge qaryzyn óteý úshin páterdi óndirip alý týraly sotqa shaǵym túsirgen.
Aıta kekteıik is №2 Medeý aýdandyq sotynda sýdıa Qanat Árinovtyń tóraǵalyǵymen qaralyp jatyr.
Eks-sýdıa Svetlana Jolmanovaǵa QR qylmystyq kodeksiniń 190-baby 4-bóliginiń 2-tarmaǵy (asa iri mólsherdegi alaıaqtyq) boıynsha aıyp taǵylyp otyr.
Buǵan deıin prokýror Raýshan Abdýlla aıyptaý aktisin oqyǵan bolatyn. Prokýror málimetinshe, aıyptalýshy 2021 jyldan bastap jyljymaıtyn múlik satyp alýǵa jáne tenderlik jobalarǵa qatysýǵa járdemdesý syltaýymen, aldaý jáne senimge qııanat jasaý arqyly azamattardyń mıllıondaǵan teńgesin qoldy qylǵan.
Eske salaıyq, osyǵan deıin sottalýshy Svetlana Jolmanovaǵa qatysty sot otyrysy bes ret keıinge shegerilgen bolatyn.
Buǵan deıin QR Bas prokýratýrasy Jolmanovanyń isi sotqa joldanǵany týraly habarlaǵan bolatyn.
Eske salaıyq, byltyr eks-sýdıa Svetlana Jolmanovanyń ustalǵany týraly jazǵanbyz.
Alǵash ret almatylyq sýdıa 2021 jyly alaıaqtyq jasady degen kúdikke ilingen.