Burynǵy MIB tóraǵasynyń ETsQ-syna táýeldilikten qalaı arylýǵa bolady – mınıstrlik usynysy
ASTANA. KAZINFORM – Múlik ıeleri birlestiginiń jańadan saılanǵan tóraǵasy týraly málimetterdi rastaýǵa jáne tirkeýge múmkindik beretin tsıfrlyq tetik engizý qajet. Bul týraly Quryltaı depýtattarynyń saýalyna Ónerkásip jáne qurylys vıtse-mınıstri Rahymjan Isaqulovtyń jaýabynda aıtylǵan.
- Qoldanystaǵy zańnamaǵa sáıkes, zańdy tulǵanyń basshysy týraly málimetterdi ózgertý habarlama tártibimen júzege asyrylady jáne «elektrondy úkimet» veb-portaly arqyly júzege asady. Degenmen tıisti ózgeristerdi engizýdiń qoldanystaǵy tetigi zańdy tulǵanyń elektrondyq tsıfrlyq qoltańbasyn paıdalanýdy kózdeıdi. Osyǵan baılanysty múlik ıeleri birlestigi tóraǵasy qaıta saılanǵan kezde naqty másele týyndaıdy: burynǵy tóraǵa zańdy tulǵanyń ETsQ-syn berýden bas tartqan nemese oǵan qoljetimdiligin saqtap qalǵan jaǵdaıda jańa basshynyń ózi týraly málimetterdi memlekettik aqparattyq júıelerge engizý múmkindigi bola bermeıdi, - dedi ol.
Vıtse-mınıstrdiń aıtýynsha, sonyń nátıjesinde úı-jaı menshik ıeleriniń basshyny qaıta saılaý týraly sheshimi men «Zańdy tulǵalar» memlekettik derekqoryndaǵy basshy týraly ózekti málimetter arasynda sáıkessizdik týyndaıdy. Bul rette jańadan saılanǵan basshynyń ókilettikterin rastaýǵa tikeleı baılanysty emes. Óıtkeni onyń ókilettikteri menshik ıeleriniń tıisti sheshimi negizinde týyndaıdy. Másele tek tirkeý derekterin jańartýdyń qoldanystaǵy tehnıkalyq tetigine baılanysty bolyp otyr.
- Osy máseleni sheshý úshin burynǵy tóraǵanyń ETsQ-syn berýine táýeldi bolmaı, MIB-tiń jańadan saılanǵan tóraǵasy týraly málimetterdi rastaýǵa jáne tirkeýge múmkindik beretin tsıfrlyq tetikti engizý múmkindigin qarastyrý oryndy, - dedi Raqymjan Isaqulov.
Osy rette ol turǵyn úı-kommýnaldyq sharýashylyq salasyndaǵy aqparattyq júıeniń qoldanystaǵy fýnktsıonalyn eskere otyryp, «elektrondy úkimet» veb-portalynda mynadaı múmkindikterdi qamtamasyz etetin jeke fýnktsıonal engizýdi usynady:
1. úı-jaı menshik ıeleriniń jınalystary men daýys berý rásimderin elektrondy formatta ótkizý jáne daýys berýge quqyǵy bar tulǵalardy avtomatty túrde anyqtaý;
2. memlekettik aqparattyq júıelermen yqpaldastyrý arqyly úı-jaı menshik ıeleriniń jeke basyn sáıkestendirý;
3. MIB-tiń jańa basshysyn saılaý týraly sheshimdi tirkeı otyryp, jınalystyń elektrondy hattamasyn qalyptastyrý;
4. Burynǵy tóraǵanyń ETsQ-syn paıdalanbaı, jańadan saılanǵan basshy týraly málimetterdi «Zańdy tulǵalar» memlekettik derekqorynyń aqparattyq júıesine berý.
- Atalǵan tásildi iske asyrý úshin turǵyn úı-kommýnaldyq sharýashylyq salasyndaǵy tıisti aqparattyq júıeni Ádilet mınıstrliginiń jáne basqa da múddeli memlekettik organdardyń aqparattyq júıelerimen yqpaldastyrý máselesin pysyqtaý qajet. Sonymen qatar bul másele boıynsha «Zańdy tulǵalardy memlekettik tirkeý jáne fılıaldar men ókildikterdi eseptik tirkeý týraly» Zańǵa túzetýler engizý qajet. Atap aıtqanda, MIB-tiń birinshi basshysyn aýystyrý jaǵdaıyna qatysty erekshe tártip belgileý usynylady, - dedi vıtse-mınıstr.
Buǵan deıin Múlik ıeleri birlestigi tóraǵalarynyń quzyretine qatysty birqatar dál emes ári ekiushty uǵymdar anyqtalǵanyn jazǵan edik.
