Burynǵy mádenıet vıtse-mınıstrine qatysty tergeý aıaqtaldy

ASTANA. KAZINFORM — 1 mlrd teńgeden astam qarajatty jymqyrdy dep aıyptalǵan Mádenıet jáne sport mınıstrliginiń burynǵy vıtse-mınıstrine qatysty tergeý amaldary aıaqtaldy, dep habarlaıdy Antıkor.

Sybaılas jemqorlyqqa qarsy qyzmet qoǵamda zańdylyq pen tártip qaǵıdatyn qamtamasyz etý, sondaı-aq joǵary laýazymdy tulǵalar arasyndaǵy sybaılas jemqorlyqty joıý boıynsha jumystaryn jalǵastyrýda. Osylaısha, Agenttik Mádenıet jáne sport mınıstrliginiń burynǵy vıtse-mınıstri jáne merdiger uıym basshylyǵyna qatysty aýyr qylmys jasaǵany boıynsha tergeýdi aıaqtady.

— Olar qyzmettik ókilettikterin asyra paıdalandy jáne 1 mlrd teńgeden astam qarajatty jymqyrdy dep aıyptalýda. Ótken jyldyń 13 jeltoqsanynda Bas Prokýratýra kúdiktilerdi sotqa berdi. Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy, — delingen Antıkor taratqan aqparatta.

Aıta keteıik, Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

Eske salsaq, byltyr naýryz aıynda Sybaılas jemqorlyqqa qarsy qyzmet sotqa deıingi tergep-tekserý sheńberinde burynǵy Mádenıet jáne sport vıtse-mınıstri aýyr sybaılas jemqorlyq qylmys jasady degen kúdikpen ustalǵanyn rastady.

Keıinnen onyń 2 aı qamaýda otyratyny habarlandy.