Burynǵy Eýroparlament depýtaty sybaılas jemqorlyq daýyna ilikti
ASTANA. KAZINFORM – Belgııanyń burynǵy saıası qaıratkeri, sotsıal-demokrattar (S&D) fraktsııasynyń ókili Marııa Arena Belgııanyń tergeý sotynda jaýap berdi.
Budan eki jyl aldyn Eýroparlament depýtattary arasynda sybaılas jemqorlyqqa qatysty janjal týyndaǵan bolatyn. Politico basylymy Marııa Arenaǵa sol qylmystyq uıymǵa qatysty bar degen aıyp taǵylǵanyn málimdedi.
Eýroparlamenttiń birneshe depýtaty men sheneýnikterine «aqsha men baǵaly syılyqtarǵa aıyrbas retinde Taıaý Shyǵystyń birneshe eline Eýroparlamentte saıası jeńildikter jasady» degen aıyp taǵylǵan.
Osy is aıasynda Belgııa polıtsııasy Eýropa astanasyn dúr silkindirgen birneshe tintý men qamaýǵa alý sharalaryn júrgizdi.
Tintý kezinde kompıýterler, uıaly telefondar men 600 myń eýro tárkilengen. Belgııa bıligi tórt kúdiktini anyqtap, olardy qamaýǵa alýǵa order bergen.
– Olarǵa qylmystyq uıymǵa qatysy bar, aqshany jylystatý jáne sybaılas jemqorlyqpen aınalysty degen aıyp taǵylyp otyr, – dep habarlady prokýratýra.
EP vıtse-prezıdenti Eva Kaılıden basqa, onyń parlamenttik keńesshisi Franchesko Djordjı, sotsıalıstik fraktsııadan Eýropalyq parlamenttiń ıtalııalyq eks-depýtaty Per Antonıo Pantserı jáne aty atalmaǵan taǵy bir Brıýsseldik lobbıst qamaýǵa alynǵan. Taǵy eki tutqyn - Kaılıdiń ákesi men Halyqaralyq kásipodaqtar konfederatsııasynyń bas hatshysy Lýka Vısentını bosatylǵan.
Ótken beısenbide Marııa Arena tergeý sýdıasy aldynda jaýap berdi, sebebi polıtsııa ony kúdikti dep tanyǵan. Alaıda onyń 2022 jyldyń jeltoqsanynda bolǵan saıası janjalǵa qatysy bar-joǵy áli anyqtalǵan joq.
Belgııalyq sotsıalıstik saıasatker Eýroparlamenttiń adam quqyqtary jónindegi kishi komıtetiniń (DROI) tóraǵasy jáne sotsıalıster men demokrattar fraktsııasynyń jetekshisi bolǵan.
Marııa Arena 2023 jyldyń qańtarynda adam quqyqtary jónindegi komıtettiń tóraıymy qyzmetinde júrgen sátte BAQ onyń shetel memleketteriniń birine saparyn deklaratsııalamaǵanyn anyqtaǵan, sodan soń ol otstavkaǵa ketti.
Marııa 2024 jylǵy Eýroparlament saılaýyna deıin Eýroparlament depýtaty boldy, keıin kandıdat retinde qaıta tirkelgen joq.
Belgııa bıliginiń tergeýi áli sotqa jetken joq.
Aıta keteıik, buǵan deıin Pákistannyń burynǵy premer-mınıstri Imran Han 14 jylǵa bas bostandyǵynan aıyrylǵanyn jazǵan edik. Oǵan áıeli ekeýi jer telimderin syıǵa aldy degen aıyp taǵylǵan.