Burynǵy eýrokomıssar Pıter Mandelson Epshteınmen baılanysy úshin qamaýǵa alyndy
ASTANA.KAZINFORM — Eýropalyq komıssııanyń burynǵy Saýda jónindegi komıssary, Ulybrıtanııanyń birinshi mınıstri jáne AQSh-taǵy elshisi bolǵan Pıter Mandelson Djeffrı Epshteınmen baılanysyna qatysty tergeý aıasynda qamaýǵa alyndy, dep habarlaıdy Euronews.
Ulybrıtanııa polıtsııasy dúısenbide Pıter Mandelsonnyń jynystyq qylmys jasaǵany úshin sottalǵan marqum qarjyger Djeffrı Epshteınmen baılanysyn áshkerelegennen keıin qyzmettik jaǵdaıdy teris paıdalaný týraly isti tergeý aıasynda tutqyndady.
— Ofıtserler 72 jastaǵy er adamdy memlekettik qyzmette júrip teris qylyq jasady degen kúdikpen qamaýǵa aldy, — delingen London polıtsııasynyń málimdemesinde.
Buǵan deıin burynǵy elshi jáne eks-eýrokomıssardyń birneshe úıinde tintý júrgizilip, ony alyp ketkeni týraly beınejazbalar jarııalanǵan bolatyn. Tártip saqshylary jaýap alý úshin ony polıtsııa bólimshesine jetkizdi.
Polıtsııa osy aıdyń basynda Mandelsonǵa qatysty tergeýdi AQSh Ádilet mınıstrligi Epshteınge arnalǵan qujattamanyń taǵy bir bóligin jarııalaǵannan keıin bastady. Sońǵy faıldar jıyntyǵynda Mandelsonnyń 2019 jyly túrmede qaıtys bolǵan qarjygermen qarym-qatynasy týraly jańa málimetter paıda boldy.
Faıldarda Mandelsonnyń 2009 jyly bıznes-hatshy qyzmetin atqarǵan kezde Epshteınmen naryqqa qatysty úkimettik aqparatpen bóliskenin kórsetetin elektrondyq hattar bar.
Ulybrıtanııa premer-mınıstri Kır Starmer 2024 jyldyń jeltoqsanynda Mandelsondy joǵary dıplomatııalyq laýazymǵa taǵaıyndady. Sodan keıin 2025 jyldyń qyrkúıeginde onyń qylmysy áshkerelengennen keıin qyzmetinen bosatty.
Mandelsondy qazir polıtsııa 10 jarym jyl buryn Epshteınge úkimettik qupııa aqparatty berdi degen aıyppen tergep jatyr. Oǵan jynystyq qatynasqa qatysty aıyp taǵylmaǵan.
Mandelson burynǵy hanzada Endrıý Maýntbatten-Vındzordyń Epshteınmen dostyǵyna baılanysty qamaýǵa alynǵanynan keıin tutqyndaldy.
Buǵan deıin Pıter Mandelson atyshýly amerıkalyq qarjyger Djeffrı Epshteınmen baılanysy úshin bıleýshi leıborıstik partııadan ketken bolatyn.
Aıta keteıik, byltyr qarasha aıyna deıin hanzada tıtýlyn ıelengen Endrıý Maýntbatten-Vındzor Ulybrıtanııada qamaýǵa alyndy. Tergeý onyń balalarǵa jynystyq qylmys jasaǵany úshin sottalǵan amerıkalyq mıllıarder Djeffrı Epshteınge qupııa aqparatty berý múmkindigin tekserip jatyr. Bul Endrıý Ulybrıtanııanyń saýda ókili qyzmetin atqarǵan kezeńde bolýy múmkin dep shamalanyp otyr.
Eske salsaq, AQSh-tyń burynǵy prezıdenti Bıll Klınton men onyń jubaıy, burynǵy memlekettik hatshy Hılları Klınton Djeffrı Epshteınge qatysty tergeý aıasynda Ókilder palatasynyń baqylaý komıtetinde kýálik berýge kelisti.