Burynǵy Eńbek vıtse-mınıstri Aqmádı Sarbasovqa qandaı aıyp taǵylyp otyr

ASTANA. KAZINFORM — Bıyl shildede burynǵy Eńbek jáne áleýmettik qorǵaý vıtse-mınıstri Aqmádı Sarbasov qamaýǵa alyndy. Kazinform agenttigi Almaty qalasy boıynsha ekonomıkalyq tergeý departamentine resmı saýal joldap istiń mán-jaıyn suraǵan edi. 

Atap aıtqanda, eks-sheneýnikke qatysty qozǵalǵan qylmystyq istiń mártebesin, aıyptyń mánin, qylmystyq kodekstiń babyn, bultartpaý sharasyn jáne tergeý satysyn naqtylaýǵa tyrystyq. 

— «Eńbek resýrstaryn damytý ortalyǵy» AQ prezıdenti Sarbasov A.A.-ǵa qatysty Qylmystyq kodekstiń 366-baby 3-bóliginiń 3-tarmaǵynda kózdelgen asa iri mólsherde para alý faktisi boıynsha sotqa deıingi tergep-tekserý júrip jatqanyn habarlaımyz, — dep túsindirdi departamentten.

Atalǵan bap boıynsha Aqmádı Sarbasovqa 12 jylǵa deıin bas bostandyǵynan aıyrý, para mólsheriniń 60–70 eselengen somasy kóleminde aıyppul salý, múlkin tárkileý jáne belgili bir laýazymdy atqarý nemese belgili bir qyzmetpen aınalysý quqyǵynan ómir boıyna aıyrý jazasy qoldanylýy múmkin.

— Qylmystyq is materıaldaryna sáıkes, «Birinshi kredıttik bıýro» JShS basshylyǵy aqparattyq qyzmet kórsetý kezinde múddesin ilgeriletý úshin «Eńbek resýrstaryn damytý ortalyǵy» AQ basshylyǵyna júıeli túrde zańsyz syıaqy berip otyrǵan, — degen jaýap aldyq vedomstvodan.

Eske sala keteıik, Aqmádı Sarbasov qyzmetinen bıyl sáýirde bosatyldy. 

Al bıyl 1 shildede Eńbek jáne halyqty áleýmettik qorǵaý mınıstrligi eks-vıtse-mınıstrdiń ustalǵanyn rastady.