Úsh balasyn úıinen qýyp shyqqan: Shymkenttiń eks-ákiminiń baýyry qamaldy
ASTANA. KAZINFORM — Astanada burynǵy áıeli men úsh balasyn turyp jatqan úıinen májbúrlep shyǵarǵan er adam qamaldy.
Eske sala keteıik, keshe elorda turǵyny Dana Ateshova burynǵy kúıeýi Marat Áıtenovtyń polıtseılermen jáne jeke sot oryndaýshylarmen birge úıine kelip, balalardy bir-birlep úıden májbúrlep shyǵarǵanyn, ózin soqqyǵa jyqqanyn áleýmettik jelide jarııalaǵan bolatyn.
Osyǵan oraı Astana polıtsııasy tergeý bastalǵanyn málimdedi.
«Jeke sot oryndaýshylary úıden shyǵarý týraly sot sheshimin oryndap jatqanda burynǵy erli-zaıyptynyń arasynda janjal týdy. Kúsh qoldaný deregi boıynsha Áıtenovke qatysty tergeý bastaldy. Tıisti saraptama taıyndaldy. Sonyń nátıjesine qaraı protsessýaldy sheshim qabyldanady» deıdi vedomstvodan.
Búgin advokat Damır Ishmametov áleýmettik jelidegi paraqshasynda Marat Áıtenovtyń qamaýǵa alynǵanyn jetkizdi.
Aıtýynsha, erteń Ákimshilik kodekstiń 73-baby boıynsha tergeý soty bolady.
«Qylmystyq kodekstiń 108-baby, 1-bólimi boıynsha is qozǵaldy. Munymen toqtap qalmaımyz, kúdiktiniń áreketinde ózge de qylmystyń belgileri bar, polıtsııadan jaza qoldanýyn talap etemiz. Sondaı-aq er adam áıeldi uryp jatqanda aralaspaı qur qarap turǵan polıtsııa qyzmetkerlerine qatysty qyzmettik tergeý júrip jatyr. Bireýi tipti sot oryndaýshylaryna kómektesip, balany jylaǵan kúıi kóterip syrtqa shyǵaryp tastady», — deıdi qorǵaýshy.
Sonymen qatar, Qazaqstannyń bala quqyqtary jónindegi ýákili Dınara Zákıeva bala quqyǵynyń buzylýyna baılanysty Bas prokýratýradan shara qoldanýyn ótinip usynym joldaǵan.
Aıta keteıik, Marat Áıtenov — Shymkenttiń burynǵy ákimi Murat Áıtenovtyń týǵan baýyry. Murat Áıtenov 2020-2023 jyldary Shymkentti basqarǵan. Byltyr qyrkúıekte Prezıdent Jarlyǵymen qyzmetinen bosatyldy.
