Burynǵy áıelin birneshe jyl qýdalaǵan stalker jaýapqa tartyldy

ASTANA. KAZINFORM — Astana qalasy Baıqońyr aýdanynyń prokýratýrasy boıynsha stalkıng deregimen qozǵalǵan qylmystyq is boıynsha memlekettik aıyptaýdy qoldap, onyń nátıjesinde tulǵa kináli dep tanyldy. 

Sotty bolǵan azamat birneshe jyl boıy ajyrasyp ketken áıeliniń mazasyn alǵan. Jábirlenýshi onymen habarlaspaımyn degenine qaramastan, onyń úıine kelip, kire beris esigin buzyp, birneshe ret páterge zańsyz kirgen. Jábirlenýshi stalkerdiń zańsyz is-áreketinen qorqyp, páterinen ketip, anasynyń úıin panalaǵan. Sonda da sottalýshy jábirlenýshiniń qyr-sońynan qalmaı, agressııa kórsetip, janjaldasqan. 

Ol sonymen qatar turaqty túrde beıtanys nómerlerden jábirlenýshige habarlasyp, hat  joldap otyrǵan. Sottalǵannyń is-áreketteri jábirlenýshiniń únemi mazasyn alyp, qorqytatyn sıpatta bolǵan.

— Jábirlenýshi stalkerdiń tarapynan júıeli túrde zańsyz áreket jasalǵandyqtan, óziniń ómiri men qaýipsizdigi únemi úreılenetin bolǵan. Bul onyń qozǵalys erkindigin jáne kúndelikti belsendiligin aıtarlyqtaı shektedi, — dep habarlady prokýratýradan. 

Astana qalasynyń qylmystyq ister jónindegi aýdanaralyq soty sottalýshyny kináli dep tanyp, oǵan 100 (júz) saǵat qoǵamdyq jumysqa tartý túrindegi jaza taǵaıyndady.

Prokýratýra zańsyz qýdalaý úshin aıyppul túrinde 200 aılyq eseptik kórsetkishke deıin, ne sol mólsherde túzeý jumystary, ne 200 saǵatqa deıin qoǵamdyq jumystarǵa tartý, ne 50 táýlikke deıin qamaýǵa alý túrindegi qylmystyq jaýapkershilik kózdelgenin eskertedi.

Eske sala keteıik, ІІM stalkıng boıynsha  sotqa 51 is joldanǵanyn málimdegen bolatyn.