Buryn jemqorlyq jasaǵan 5 adam kvazımemsektorda alańsyz jumys istep júrgen
ASTANA. KAZINFORM — Antıkordyń málimetinshe, jemqorlyqqa qarsy komplaens-ofıtserler 2,2 myńnan astam jemqorlyq táýekelin anyqtaǵan.
2020 jyly Sybaılas jemqorlyqqa qarsy is-qımyl týraly zańda alǵash ret jemqorlyqqa qarsy komplaens ınstıtýty kózdelgen.
Onyń negizgi mindeti — jemqorlyqtyń aldyn alý jáne kvazımemlekettik sektorda sybaılas jemqorlyqqa qarsy zańnamanyń saqtalýyn qamtamasyz etý.
Búgingi tańda komplaens-qyzmetter osy sektordyń 6 myńnan astam uıymdarynda jumys isteıdi.
2022 jyldan bastap olardyń atqarýshy organnan táýelsizdigi qamtamasyz etildi, olar tek joǵary basqarý organyna esep beredi.
2023 jyldan bastap Sybaılas jemqorlyqqa qarsy qyzmetke jemqorlyqqa qarsy komplaens-qyzmetterdiń jumysyn úılestirý jáne biryńǵaı úlgilik erejeni ázirleý quzyreti berildi.
Úılestirý ádisnamalyq qoldaý, oqytý jáne aqparat almasýdy qamtamasyz etýden turady.
Sybaılas jemqorlyqqa qarsy qyzmet 2023 jyly komplaens-ofıtserlerdiń biliktiligin arttyrý maqsatynda 10-nan astam konferentsııalar men semınarlar ótkizdi.
Elimizdiń barlyq óńirinde «Sybaılas jemqorlyqqa qarsy komplaens mektepteri» uıymdastyrylǵan, onda jetekshi otandyq jáne halyqaralyq sarapshylardyń qatysýymen oqytylady.
Nátıjesinde ótken jyly ǵana komplaens-ofıtserler 2,2 myńnan astam jemqorlyq táýekelin anyqtady.
Onyń ishinde 70 múddeler qaqtyǵysy jáne buryn jemqorlyq jasaǵan adamdardy jumysqa qabyldaýdyń 5 faktisi bar.
Barlyq faktiler boıynsha tıisti shara qabyldandy, kvazımemlekettik sektordyń 5 basshysy ákimshilik jaýapkershilikke jáne 57 adam tártiptik jaýapkershilikke tartyldy.
Osy ınstıtýtty jetildirý maqsatynda sybaılas jemqorlyqqa qarsy qyzmet komplaens-protsesterdi avtomattandyrý boıynsha jumys júrgizýde.
Bul táýekelderdi azaıtýdy, esep berý jáne baqylaý protsesterin jaqsartýdy, ashyqtyq pen tıimdilikti arttyrýdy qamtamasyz etedi.
Jalpy, Qazaqstandaǵy jemqorlyqqa qarsy komplaens ınstıtýty damý protsesinde tur, qabyldanyp jatqan sharalar korporatıvtik parasattylyqty arttyrýǵa jáne jemqorlyq táýekelderin tómendetýge yqpal etedi.
