Buryn-sońdy bolmaǵan múmkindik: Halyq keńesi arqyly saıasatqa kelý shegi tómendeıdi

ASTANA. KAZINFORM — Saıasattanýshy Marat Shıbutov jańa Konstıtýtsııa týraly áleýmettik jelilerde taraǵan qaýesetterdi, joramaldar men feıkterdi joqqa shyǵardy.

— Sońǵy birneshe kúnde áleýmettik jelilerge úńilip, kóp jańa dúnıeni bildim. Keı adamdar bizdiń Komıssııamyzdyń jumysy týraly otyrysqa qatysyp júrgen menen de kóbirek «biletin» sııaqty. Olar Konstıtýtsııa jobasy áli jarııalanbaı turyp-aq nebir jalǵan aqparattar jazyp úlgergen, — dedi M. Shıbutov elordada Konstıtýtsııalyq komıssııanyń jetinshi otyrysynda.

Onyń aıtýynsha, qujat kez kelgen adam oqyp, tanysýy úshin kópshilikke ashyq túrde jarııalanǵannan keıin de aqparatty ádeıi burmalaý toqtamaǵan.

— Ony eshkim oqymaıdy dep oılaıtyn shyǵar. Menińshe, mundaı adamdardy jaýapkershilikke tartý kerek, óıtkeni bul oıynshyq emes, adamdar onyń asa mańyzdy másele ekenin túsinýi tıis. Mysaly, Halyq keńesi turǵanda, «jańa Konstıtýtsııa jobasy saıası monopolııaǵa ákep soǵady» dep qaıta-qaıta jazýdyń qandaı qajeti bar, — deıdi saıasattanýshy.

Saıasattanýshy naqty esepterdi de keltirdi. Qazir Qazaqstan Respýblıkasynyń Senaty 40 máslıhat ókilinen, Prezıdent kvotasy boıynsha 5 adamnan jáne Qazaqstan halqy Assambleıasynyń 5 ókilinen quralǵan.

Al Halyq keńesine máslıhat ókilderinen bólek, qoǵamdyq keńesterdiń músheleri de engiziledi, QHA ókilderiniń sany 5-ten 42-ge kóbeıtilip, qoǵamdyq uıymdardan — 42 adam qosylady. Osylaısha, jańa saıası ınstıtýttaǵy azamattyq ókildik Qazaqstan tarıhyndaǵy eń aýqymdy deńgeıge jetkizilmek.

— Halyq keńesi kóptegen adam úshin saıasatqa kelý shegin aıtarlyqtaı tómendetedi, buryn-sońdy mundaı múmkindik bolmaǵan. Bul óte mańyzdy, — dedi Marat Shıbutov.

Buǵan deıin Murat Ábenov Qazaqstan ratıfıkatsııalaǵan halyqaralyq kelisimderden Konstıtýtsııa basym turatynyn, birinshi kezekte Ata zań baptary qoldanylatynyn aıtqan edi.