Buryn kim bolǵanymyzdan qazir kim ekenimiz, bolashaqta kim bolatynymyz mańyzdy — Toqaev
Memleket basshysy Qasym-Jomart Toqaev eskilikke boı urýǵa bolmaıdy dep sanaıdy. Onyń sózinshe, baıaǵyda uly halyq bolǵanbyz dep masattanyp nemese burynǵy ókpe-renishterdi qozdatyp, qyzylkeńirdek bolyp aıtysýdyń qajeti joq, dep habarlaıdy Kazinform.
— Biz bolmashy nárselerge basa nazar aýdaryp, usaq-túıekti talqylaýǵa búkil kúsh-qýatymyzdy sarp etemiz. Odan da soraqysy, áldekimderdiń jalǵan sózine erip, aramter bolamyz. Mundaı paıdasyz isterge alańdap, ulttyń strategııalyq baǵdarynan jańylmaýǵa tıispiz. Baıaǵyda uly halyq bolǵanbyz dep masattanyp nemese burynǵy ókpe-renishterdi qozdatyp, qyzylkeńirdek bolyp aıtysýdyń qajeti qansha?! Bulaı eskilikke boı urýǵa áste bolmaıdy. Álbette, tarıh — bizdiń jalpyulttyq biregeıligimizdiń mańyzdy bóligi. Sondyqtan memleket dál qazir bul baǵytta júıeli jumys júrgizip otyr. Atap aıtsaq, túrli taqyryptaǵy kitaptar kóptep shyǵarylýda. Jańa ǵylymı mekemeler qurylyp, burynǵy ınstıtýttar jańǵyrtylyp jatyr. Jaqynda stalındik repressııa qurbandaryn aqtaý jóninde aýqymdy zertteý jumysy aıaqtaldy. Bir sózben aıtqanda, san ǵasyrlyq tarıhymyzdy zertteý, tarıhı ádildikti qalpyna keltirý bizdiń negizgi mindetimizdiń biri bolyp qala beredi, — dep atap ótti Prezıdent Egemen Qazaqstan gazetine bergen suhbatynda.
Alaıda onyń aıtýynsha, bizdiń buryn kim bolǵanymyzdan qazir kim ekenimiz, eń bastysy, bolashaqta kim bolatynymyz áldeqaıda mańyzdy.
Sondyqtan qandaı qıyndyqtan ótkenimizdi baǵamdaıtyn kezde ǵana aýyzbirshilik tanytpaı, baıandy bolashaqqa da birge qadam basýymyz qajet.
— Biz ótkendi ańsaýmen ómir súrmeýimiz kerek. Kerisinshe, keleshegimizdi kemel etýge umtylyp, ulttyń ulylyǵyn naqty ispen dáleldeýge tıispiz. Dúnıetanymymyzǵa jat mádenıetterge kózsiz elikteýden, jalǵan patrıotızmnen, dańǵoılyq pen daraqylyqtan saqtanýymyz kerek. Halqymyzdyń boıyndaǵy kemshilikterge kóz juma qaramaı, odan arylýymyz qajet. Munyń bári kún saıyn qubylǵan turlaýsyz zamanda ómir súrip jatqan Qazaqstannyń keleshegi úshin aıryqsha mańyzdy. Sondyqtan ultymyz ósip-órkendesin desek, biz jaqsydan úırenip, jamannan jırene bilýimiz kerek. Qoǵamda eńbekqorlyq pen jasampazdyq joǵary baǵalanýǵa, bilimpazdyq pen jańashyldyq saltanat qurýǵa tıis. Sondaı-aq ómirge degen baısaldy jáne baıypty kózqaras basym bolǵany jón. Ashyǵyn aıtaıyn, ózin «ulttyń qaımaǵymyz» dep sanaıtyn keıbir zııaly qaýym ókilderi osy mıssııasyn óz deńgeıinde atqaryp júrgen joq. Olar ultqa úlgi-ónege kórsetýdiń ornyna, usaq-túıek áńgimelerdi qozdatýdan, ádettegideı «bizdiń halyq asa danyshpan» dep qaıtalaı berýden nemese qara basynyń qamyn kúıttep, bılikke «jaǵdaıymdy jasamady» dep ókpe artýdan asa almaı otyr. Osylaısha ulttyq ıdeologııanyń damý jolynda jalǵandyqqa jol beriledi, — deıdi Prezıdent.
Memleket basshysy ozyq oıly ult retinde halqymyzdy ydyratatyn emes, biriktiretin joldy tańdap, tek qana alǵa qaraýymyz kerek ekenin qadap aıtty.
Jalpyulttyq qundylyqtar bárinen joǵary turýǵa tıis.
— Bul týraly únemi aıtyp júrmin. Taǵy da qaıtalaımyn, eńbekqorlyq, bilimpazdyq, kásibılik, birlik, yntymaq, janashyrlyq, iskerlik, bastamashyldyq, adaldyq, qarapaıymdylyq jáne únemshildik — naǵyz otanshyl, adal azamatqa tán qasıetter men qundylyqtar. Halqymyzdyń qýatyn arttyryp, tabysqa jeteleıtin osyndaı qasıetter men qundylyqtardy jan-jaqty dáriptep, urpaq sanasyna sińirý arqyly ǵana sapaly ultqa aınala alamyz, — dedi Qasym-Jomart Toqaev.
