Buryn kádege aspaǵan qoı júni endi qurylys materıalyna aınaldy
ASTANA. KAZINFORM – Qazaqstanda buryn tolyqqandy kádege aspaı kelgen qoı júniniń qoldanys aıasy keńeıip keledi. Búginde odan úılerge arnalǵan jylý jáne dybys oqshaýlaǵysh materıaldar, ónerkásipke qajetti tehnıkalyq kıiz óndirilip, tipti aǵash otyrǵyzý kezinde de paıdalanylyp jatyr.
Osydan biraz ýaqyt buryn Qazaqstandaǵy qoı júniniń 85%-ǵa jýyǵy óńdelmeı, kádege jaratylatyn. Qazir qoı júnin ónerkásiptik deńgeıde óńdeý Aqtóbede qolǵa alynǵan. Munda 100% tabıǵı qoı júninen toqyma emes materıaldar shyǵaratyn Ortalyq Azııadaǵy alǵashqy ári jalǵyz KazFelTec kásiporny jumys isteıdi.
Zaýytqa shıkizat negizinen Qazaqstannyń batys jáne ońtústik óńirlerindegi sharýa qojalyqtarynan jetkiziledi. Kásiporyn jylyna 3 600 tonnaǵa deıin jún óńdep, 2 100 tonnaǵa deıin daıyn ónim shyǵarýǵa qaýqarly. Óndiriste 50-den astam jumys orny ashylǵan.
Qazaqstandyq jún ıtalııalyq Cormatex S.r.l. kompanııasynyń jabdyǵynda Airlay tehnologııasy boıynsha óńdeledi. Daıyn ónim NomadTherm brendimen shyǵarylady.
Óndiristiń negizgi baǵyttarynyń biri – NomadTherm Panel. Bul qabyrǵa qaptamalary, shatyr men edenge arnalǵan jylý jáne dybys oqshaýlaǵysh panelder. Sondaı-aq olar SIP jáne sendvıch-panelderdiń toltyrǵyshy retinde qoldanylady.
Materıal −50 °C-tan +200 °C-qa deıingi temperatýrada óz qasıetin saqtaıdy jáne qurylym ishinde ylǵal jınamaıdy. Sondaı-aq baıaý tutanatyn ári ózdiginen sónetin materıaldar sanatyna jatady.
Óndiristiń ekinshi baǵyty – NomadTherm Felt tehnıkalyq kıizi. Ol ónerkásiptik tyǵyzdaǵyshtarda, jabdyqtardyń dirilin oqshaýlaýda jáne súzgileýde qoldanylady. Sonymen qatar jeńil ónerkásipte arnaıy kıim, aıaq kıim men túrli aksessýarlar jasaýda jáne aýyl sharýashylyǵynda paıdalanylady.
Kıizdiń dástúrli qoldanysy da saqtalǵan. Ony kıiz úılerdi jyly ustaý jáne árleý úshin qoldanady.
Budan bólek, kıiz qalany kógaldandyrýda da kádege jarap otyr. Kompanııa ekologtarmen birlesip, aǵash otyrǵyzý kezinde ony topyraq betin jabatyn materıal retinde qoldanady. Kıiz topyraqtaǵy ylǵaldy saqtap, kóshetterdiń jersinýine kómektesedi.
– Qazaq halqy úshin kıiz – tarıhymyz ben mádenıetimizdiń ajyramas bóligine aınalǵan, jaqsy tanys materıal. Bizdiń mindetimiz – zamanaýı tehnologııalardyń arqasynda onyń qoldanylý aıasy múlde jańa baǵyttarǵa jol ashqanyn kórsetý. Búginde kıiz qurylystan bastap ónerkásipke, aýyl sharýashylyǵy men qalalardy kógaldandyrýǵa deıin qoldanylyp keledi. Qazaqstanda tabıǵı ári ekologııalyq taza materıaldarǵa degen qyzyǵýshylyq aldaǵy ýaqytta arta túsetinine senimdimiz, – dedi «KazFelTec» JShS dırektory Erlan Jańabergenov.
Kásiporyndaǵy ekologııalyq tásil tek tabıǵı shıkizatty paıdalanýmen shektelmeıdi. Tehnologııalyq úderiste qoldanylatyn sýdyń 94%-y tazartylyp, qaıtadan óndiristik aınalymǵa jiberiledi.
Materıaldardyń quramynda ýly shaıyrlar men sıntetıkalyq baılanystyrǵyshtar joq. Montajdaý kezinde shań shyǵarmaıdy jáne terini titirkendirmeıdi. Ushpa organıkalyq qosylystar (VOC) emıssııasynyń deńgeıi 10 mkg/m³-den aspaıdy. Bul materıaldardy turǵyn úıler men balalarǵa arnalǵan úı-jaılarda qoldanýǵa múmkindik beredi.
Kásiporynnyń kelesi maqsaty – halyqaralyq naryqqa shyǵý. Qazir KazFelTec Shveıtsarııa men Eýropalyq odaq elderindegi áleýetti seriktestermen kelissózder júrgizip, ónimdi qajetti sertıfıkattaý rásimderinen ótkizýge daıyndap jatyr.
Búginde ónimniń QR sáıkestik deklaratsııasy (QR TR №435), EAEO deklaratsııasy (KO TR 017/2011) jáne RF sáıkestik sertıfıkaty bar. Sonymen qatar ónim mindetti zerthanalyq synaqtardan ótedi. Jańa naryqtarǵa shyqqan saıyn kompanııa sertıfıkattar aıasyn keńeıtýdi jalǵastyrady.
Osylaısha, kúni keshege deıin el ishinde tolyqqandy kádege aspaı kelgen qoı júni búginde qurylys pen ónerkásipten bastap aýyl sharýashylyǵy men qalany kógaldandyrýǵa deıingi birneshe salaǵa qajet ónimniń shıkizatyna aınalyp otyr.
Aıta keteıik, buǵan deıin teri men jún óńdeıtin 8 ınvestıtsııalyq joba iske asyrylatyny habarlandy.
