Keı qalalardaǵy muǵalim, dáriger men áleýmettik qyzmetkerler jalaqysy ósti

ASTANA. KAZINFORM – Úkimettiń 2025 jylǵy 3 maýsymdaǵy qaýlysymen azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndar qyzmetkerlerine eńbekaqy tóleý júıesine tolyqtyrý engizildi. 

Qujatqa sáıkes, densaýlyq saqtaý, bilim berý, áleýmettik qamtamasyz etý, mádenıet, sport, veterınarııa, orman sharýashylyǵy jáne erekshe qorǵalatyn tabıǵı aýmaqtar salalarynda jumys isteıtin mamandardyń jalaqysy kóbeıdi. Bul ózgeris memlekettik bıýdjetten qarjylandyrylatyn, buryn aýyldyq eldi meken mártebesine ıe bolǵan qalalarda ornalasqan uıym qyzmetkerlerine qatysty.

Osylaısha olardyń jalaqysy 25 paıyzǵa ulǵaıdy. Qosymsha aqy eldi meken mártebesi ózgergen kúnnen bastap eki jyl ishinde tólenedi.

Qaýly 2025 jylǵy 24 shildeden bastap kúshine enedi jáne 2024 jylǵy 10 qańtardan keıin týyndaǵan quqyqtyq qatynasqa qoldanylady.

Aıta keteıik, elimizde eń tómengi jalaqy mólsheri 90 myń teńgeden asýy múmkin.