Burger King-te eńbek zańnamasyn júıeli túrde buzý faktileri anyqtaldy
ASTANA. KAZINFORM — Memlekettik eńbek ınspektsııasy komıtetiniń Almaty qalasy boıynsha departamenti «QSR» JShS-ne (Burger King) qatysty júrgizilgen jospardan tys tekserýdi aıaqtady. Bul týraly Eńbek jáne halyqty áleýmettik qorǵaý mınıstrligi habarlady.
Mınıstrliktiń málimetinshe tekserý qyzmetker Qarataı Álibektiń ótinishi negizinde júrgizildi.
Tekserý barysynda ótinish berýshiniń ýájderi tolyqtaı rastaldy.
— Jumys berýshi tarapynan eńbek zańnamasynyń talaptaryn júıeli túrde saqtamaý faktileri anyqtaldy. Atap aıtqanda, jumyskerlerdiń kelisiminsiz jalaqydan zańsyz ustap qalý, jalaqyny júıeli túrde keshiktirý, naqty jumys istegen ýaqytty esepke almaý jáne mereke ári demalys kúnderindegi eńbekaqyny joǵarylatylǵan mólsherde tóleý talaptaryn saqtamaý faktileri tirkeldi. Sonymen qatar, aýysym kesteleri jumyskerlerge zańmen belgilengen merzimderdi buza otyryp jetkizilgen, — delingen mınıstrlik habarlamasynda.
Sondaı-aq ınspektorlar kompanııanyń jumyskerlerdi qajetti arnaıy kıimmen jáne jeke qorǵanysh quraldarymen qamtamasyz etpegenin, al personaldyń eńbekti qorǵaý boıynsha mindetti nusqamalardan ótpeı-aq óz mindetterin oryndaýǵa jiberilgenin anyqtady.
Tekserý qorytyndysy boıynsha «QSR» JShS-ne barlyq anyqtalǵan buzýshylyqty mindetti túrde joıý týraly nusqama berildi.
Zańdy tulǵaǵa qatysty Ákimshilik quqyq buzýshylyq týraly kodeksiniń 87, 93 jáne 94-baptary boıynsha ákimshilik is qozǵaldy.
Jaǵdaı jumyskerlerdiń eńbek quqyqtary tolyq qalpyna keltirilip, berilgen nusqamadaǵy sharalar oryndalǵanǵa deıin memlekettik eńbek ınspektorlarynyń baqylaýynda bolady.
Aıta ketelik eńbek shartyn tirkeýge qatysty jańa talaptar men jaýapkershilik engiziledi.
