«Býran» desantty-shabýyldaýshy toptyń jaýyngerleri qaza tapqan qarýlastaryna eskertkish ornatty

Atalǵan eskertkish ol qyzmet etken 2022 áskerı bólimi aýmaǵynda boı kóterdi. Gúl shoqtaryn qoıý rásimine qaza bolǵan jaýyngerdiń týǵan-týystary qatysty. Eske alý rásiminde bir mınýt únsizdik jarııalandy, zeńbirekten oq atyldy. A.Qazıev 12 jyldan beri jumys istep kele jatqan «Býran» desantty-shabýyldaýshy toptyń qatarynan birinshi qurban bolyp otyr.

Qaıǵyly oqıǵa aǵymdaǵy jyldyń 26-shy maýsymynda Kegen shatqalynda Qazaqstannan Qyrǵyzstanǵa kontrabandylyq dızel janarmaıyn tıegen avtotsısterna kóligin ustaý kezinde oryn alǵan. Ustalǵandardyń arasynda eki eldiń de azamattary bolǵan. Bul oqıǵa boıynsha tergeý jumystary áli júrip jatyr, sol sebepti ol jaıynda maǵlumat aldyn ala berilmegen.

A.Qazıev ustalǵan kólikterdiń birinde otyrǵan. Sońǵy shepte kele jatqan KamAZ aýyr júk kóliginiń tejegishi isten shyǵyp, kóp tonnaly kólik órtke qaýipti júgimen aldyńǵy lekke qaýip keltirgen. Sol sátte Ardaq basqarýdan shyqqan mashınany taý jolymen túsip kele jatqan aldyńǵy kólikterden basqa jaqqa buryp úlgergen.

Qyzylordadadan kelgen qaharman shekarashynyń ákesi Orazbek Qazıev Ardaqtyń eki jyl Jarkentte áskerı boryshyn ótegendigin aıtady. Úıine jazǵan bir hatynda ol áskerı qyzmetin kelisimshart boıynsha jalǵastyrǵysy keletindigin jazǵan. Ata-anasy balanyń sheshimine qarsy bolmaǵan.