Buralqy ıtterdi aýlaýǵa, zararsyzdandyrýǵa qansha qarajat qajet

ASTANA. KAZINFORM – Májilis depýtaty Erbolat Satybaldın qańǵybas ıtterdiń taǵdyryna qatysty birneshe usynys baryn aıtty.

«Álemde buralqy ıtterge qatysty eki praktıka bar, biri ustap, zararsyzdandyrý arqyly óz ortasyna qaıta jiberý. Ekinshi tásil ıtterdi qaıtarymsyz aýlaý, onyń da eki túri bar, birinshi ony ómir baqı baǵý, ekinshisi jansyzdandyrý. Odan bólek, zań jobasy aıasynda buralqy ıtterdiń sany men olardyń qaýpin azaıtý máselesi talqylanyp jatyr», - dedi Erbolat Satybaldın «Janýarlarǵa jaýapkershilikpen qaraý týraly» zańǵa ózgerister men tolyqtyrýlar engizý máselesine arnalǵan dóńgelek ústel barysynda. 

Halyq qalaýlysynyń aıtýynsha, buralqy ıtterdiń taǵdyryna qatysty pikir san alýan. 

«Itterdi qaıtarymsyz aýlaýdy qoldaıtyn kisiler bar, olardyń dálelderi bar. Keıbiri ıtterge vaktsına egip, zararsyzdandyrý arqyly óz ortasyna qaıta jiberý kerek dep sanaıdy. Iesi bar ıtterge qatysty 2021 jylǵy zańda jaýapkershilik týraly bap bar, ókinishke qaraı ol bap qazir jumys istemeı tur. Qazir osy bapty tolyqtyrý jaǵy qaralyp jatyr. Qazirgi esep boıynsha 300 myńdaı qańǵybas ıt bar deıdi, olardyń bárin bir mezette aýlap, zararsyzdandyrýǵa 15 mlrd teńgedeı qarjy qajet, odan bólek jyl saıyn vaktsına egý kerek. Sondyqtan bıýdjet boıynsha memleketke salmaq salmaý jaǵyn da oılastyrýymyz kerek. Eń bastysy adamdardyń, qoǵamnyń qaýipsizdigi», - deıdi ol. 

Aıta keteıik, búgin Májilistiń Ekologııa máseleleri jáne tabıǵat paıdalaný komıteti «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý máselelerine arnalǵan dóńgelek ústel ótti. 

Eske sala ketsek, jyl basynda Ekologııa jáne tabıǵı resýrstar mınıstri Erlan Nysanbaev eldi mekenderde buralqy ıtterdiń kóbeıýi turǵyndarǵa qaýip tóndirip jatqanyn aıtqan edi.