Bıyl Býrabaıǵa 600 myńnan astam týrıst kelgen
Prezıdent is basqarýshysy Aıbek Dádebaev «Býrabaı» ulttyq saıabaǵy men «Býrabaı Damý» kásipornynda týrızmdi damytý isi qalaı júzege asyp jatqanyn aıtyp berdi.
Prezıdent Іs basqarmasyna qarasty «Býrabaı» ulttyq saıabaǵy men «Býrabaı Damý» kásiporny — elimizde týrızmdi damytýǵa, ásem tabıǵatty qorǵaýǵa erekshe úles qosyp júrgen irgeli mekemeler.
«Bıyl qańtar-qazan aılarynda ulttyq parkke kelýshilerdiń jalpy sany 600 myńnan asty. Árıne, Saryarqanyń jaýhary sanalatyn ólkege halyqtyń qyzyǵýshylyǵy artyp kele jatqany qýantady. Degenmen, adam aıaǵy kóbeıgen saıyn, tumsa tabıǵatty saqtaý isine de soǵurlym kóbirek mańyz berýge týra keletinin eskergen jón. Osyǵan deıin kýrorttyq aımaqta Smart National Park Burabay jobasynyń eki kezeńi júzege asyrylǵan bolatyn. Úshinshi kezeń sheńberinde ǵylymı-zertteý jumystaryn bastaý, 5 ótkizý-baqylaý beketin avtomattandyrý, qorshaǵan ortany baqylaýǵa jáne monıtorıng jasaýǵa arnalǵan 3 beınekamera qoıý syndy ınfraqurylymdyq jumystar qolǵa alyndy», — deıdi Aıbek Dádebaev.
Onyń aıtýynsha, qazir birneshe sekýnd ishinde kóliktiń túrin, markasyn jáne memlekettik nómirin tirkeýge alyp úlgeretin avtomatty júıe testilik rejımde istep tur.
Bul beketterde keptelis týyndamaýyna, jemqorlyq qaterlerin boldyrmaýǵa, júrginshilerge qolaıly jaǵdaı jasaýǵa yqpal etedi.
«Osy oraıda Smart National Park Burabay júıesi órttiń aldyn alý, brakonerlerdiń jolyn kesý syndy jumystarǵa da oń áserin tıgizgenin atap ótkim keledi. On aı ishinde ulttyq park aýmaǵyndaǵy týrıstik marshrýttarda serýendegen adam sany 33 myńnan asyp tústi. Halyqtyń qyzyǵýshylyǵy joǵary ekenine kóz jetti. Sol úshin Shýche jáne Býrabaı kólderin aınala salynǵan velojoldar men jaıaý júrginshilerge arnalǵan soqpaqtar áli de uzara túsip, bıyl Aqbýra kýrortyna deıin jetýge tıis. Aldaǵy ýaqytta qosymsha 8 sholý alańyn, kólik qoıatyn 4 alań salynady dep josparlanyp otyr. Kýrorttyq aımaqta baılanys pen ınternet júıesin jetildire túsý úshin jańadan uıaly baılanys stantsııalary salyna bastaıdy, burynǵy bazalyq stantsııalar jańartylady», — dep atap ótti Prezıdenttiń is basqarýshysy.
Jylma-jyl orman alqabyn ulǵaıtyp otyrý isi de jospar boıynsha júrip jatyr. Bıyl Aqylbaı orman sharýashylyǵynyń aýmaǵynan jańa tálimbaq salý úshin 50 gektar jer belgilendi.
Ormanshylar turatyn kordondar men keńselerdiń birazy jańaryp, 6 orman sharýashylyǵynyń ınspektorlary jańa qonysqa kóship úlgerdi.
«Joǵaryda aıtyp ótkenimdeı, týrızmdi damytý men qorshaǵan ortany qorǵaý jumystary bir-birimen tyǵyz baılanysty. Halyq sany artqan saıyn, ınfraqurylymdy da jetildirip otyrý kerek. Osy oraıda, „Býrabaı“ ulttyq parki men „Býrabaı Damý“ kásiporny jergilikti ákimdikpen birlesip, qoqysty ýaqytyly shyǵarý, tabıǵat aıasynda tazalyqty qamtamasyz etý jumystaryna basa nazar aýdaryp keledi. Jalpy týrıstik óńirde jurtshylyqqa qolaıly jaǵdaı jasaý jumystary júıeli túrde jalǵasa beredi», — deıdi Aıbek Dádebaev.
