Býrabaıdyń shıpaly sýlary medıtsınalyq týrızmde qoldanylady
KÓKShETAÝ. QazAqparat - Aqmola oblysynyń ákimi Málik Myrzalın jumys saparymen Býrabaı aýdanynda bolyp, jergilikti qonaqúı ıelerimen kýrortty óńirde saýyqtyrý týrızmin damytý salasynda áriptestik ornatý máselelerin talqylady, dep habarlaıdy QazAqparat tilshisi ákimdiktiń baspasóz qyzmetine silteme jasap.
«Otel-bul týrısterdiń bizdiń oblys týraly áser alatyn eń birinshi nysany. Qonaqtardyń osynda qaıta-qaıta kelýine barynsha jaǵdaı jasaý qajet. Ol úshin bizde barlyq múmkindik bar. Aımaqtaǵy shıpajaılar, qylqan japyraqty orman men móldir kólder, tabıǵı mıneraldy sý kózderi kez-kelgen týrıstiń júregin baýrap alatyny anyq», - dep atap ótti jıynda M.Myrzalın.
Osy oraıda, «Kókshetaý mıneraldy sýlary» aktsıonerlik qoǵamynyń dırektorlar keńesiniń tóraǵasy Murat Ahmetov jıynǵa qatysýshylarǵa kýrortty aımaqta jappaı qoldanylatyn jańa qazaqstandyq brendi «Qulager-Vurabai» emdik-as sýyn tanystyrdy. Bul shıpaly sý Kókshetaý bıiktigindegi «Qulager-Vurabai» jer asty sý kózderinen alynady. Uńǵyma respýblıkalyq sýmen saýyqtyrý nysandary tizilimine engizilgen.
«Bul emdik sýdy Býrabaı shıpajaılarynda qoldaný elimizde medıtsınalyq týrızmdi damytýǵa múmkindik berip qana qoımaıdy, «Essentýkı», «Borjomı», «Karlov Vary» sııaqty álemge tanymal kýrortty qalalardyń balamasy bolýǵa jol ashady. Zertteý nátıjeleri kórsetkendeı quramynda adam aǵzasyna qajetti 16 tabıǵı mıneraldan turatyn shıpaly sý 10-nan astam dertti emdeýge paıdasy zor», - dedi Murat Ahmetov.
Jıynda «Oqjetpes» emdeý-saýyqtyrý kesheniniń basshysy Stanıslav Pshenıchnyı radon sýynyń densaýlyqqa paıdasy týraly aıtyp berdi. «Ótken jyly biz radon as sýyn alatyn uńǵyma qazdyq. Bul - óńirdegi jalǵyz uńǵyma. Dúnıe júzinde osyndaı 500-ge jýyq sý kózderi bar eken. Mysaly, Altaı, Qyrym, Bad-Brambahe, Tshal-týbe de radon sýlaryn adamnyń qan qysymyn turaqtandyryp, júrek qan tamyrlaryn jaqsartý úshin qoldanady», - dedi Stanıslav Pshenıchnyı.
Sonymen qatar, qonaqúı bıznesi ókilderi saýyqtyrý jáne sýmen emdeý boıynsha medıtsınalyq qyzmet kórsetý úshin lıtsenzııa alý tárbimen tanysty. Budan keıin oblys ákimi Býrabaı aımaǵyndaǵy birqatar nysandardyń jazǵy maýsymǵa daıyndyǵyn pysyqtady. Onyń ishinde, «Jekebatyr» shıpajaı kýrortty mekemesinde quny 1,5 mıllıard teńgege jóndeý jumystary júrgizýlde. Keler jyly keshenniń eki korpýsynda jóndeý jumystaryn tolyq aıaqtaý josparlansa, úshinshi ǵımarat súrilip, ornyna halyqaralyq standarttarǵa saı jańasy salynbaq.
«Tıbettik medıtsına, sazben emdeý, 46 túrli medıtsınalyq sharalar, «Qulager-Vurabai» mıneraldy sýy - bunyń barlyǵyn jańǵyrtý jumystary júrgizilip jatqanyna qaramastan, «Jekebatyr» shıpajaıy usynatyn bolady», - dep túsindirdi shıpajaı basshysy Ahan Janpeıisov.
