Býrabaıdaǵy kólderge 60 myńdaı tuqy shabaǵy jiberildi

ASTANA. QazAqparat – «Býrabaı» memlekettik tabıǵı ulttyq parkiniń mamandary Shortandy, Býrabaı jáne Úlken Shabaqty kólderine 60 myńǵa jýyq tuqy shabaǵyn jiberdi. Bul týraly QazAqparat QR Prezıdenti Іs Basqarmasynyń baspasóz qyzmetine silteme jasap habarlaıdy.

«Biz ulttyq park aýmaǵyndaǵy sý aıdyndaryna balyq jiberýdi berilgen usynymdarǵa sáıkes turaqty negizde júrgizemiz. 2010-2019 jyldar aralyǵynda kólderge 477 myń tuqy shabaǵy men 19 mıllıonnan astam aq balyq tuymdas rıpýs pen pelıad maıshabaqtaryn jiberdik. Keıin pandemııaǵa baılanysty jumys ýaqytsha toqtatylǵan-dy. Bıyl qaıta qolǵa alyp, parktegi eń úlken úsh kóldi tuqy balyǵymen toltyrdyq», - dedi «Býrabaı» MUTP ınjener-ıhtıology Maksım Pak.

Tuqy – «Býrabaı» MUTP kólderiniń ıhtıofaýnasyna beıimdelgen baǵaly balyq túri. Ǵylymı qyzmetkerlerdiń pikirinshe, onyń kóbeıgeni kólderdiń ekojúıesine jaǵymdy áser etedi.

«Ár balyqtyń ortasha salmaǵy – 25 g. Alty aıda birshama jetilgen balyqtardyń sýyqta azdap salmaǵy azaıǵanymen, qysty jaqsy ótkizedi», - deıdi janýarlar dúnıesin qorǵaý jáne molaıtý bóliminiń mamandary.

Ulttyq park kólderine qandaı balyq túrin jiberýdi, usynylatyn balyq aýlaý lımıtin osynda jyl saıyn zertteý júrgizetin «Balyq sharýashylyǵy ǵylymı-óndiristik ortalyǵy» JShS-niń aýmaqtyq fılıaly aıqyndaıdy.

Aıta ketý kerek, Prezıdent Іs Basqarmasyna qarasty «Býrabaı» ulttyq tabıǵı parki – respýblıkalyq mańyzy bar erekshe qorǵalatyn tabıǵı aımaq júıesine kiretin memlekettik tabıǵat qorǵaý mekemesi.