Býrabaıdaǵy Kókshe taýynda orman órtendi
Aqmola oblysy TJD baspasóz qyzmetiniń málimetinshe, oqıǵa 13 shildede saǵat 16:12-de bolǵan. Órt shamamen 0,14 gektar aýmaqty sharpydy.
Órtti sóndirýge Aqmola oblysy TJD jáne «Býrabaı» memlekettik ulttyq tabıǵı parkinen 120-dan astam adam men tehnıka jumyldyrylǵan. Sonymen qatar sý aǵyzý qurylǵysy bar Qazavıaqutqarý tikushaǵy tartyldy.
Nátıjesinde, saǵat 18.25-te órt oqshaýlandy.
Oqıǵa ornynda Aqmola oblysynyń ákimi Ermek Marjyqpaevtyń basshylyǵymen jedel shtab quryldy.
Aıta keteıik, qazirgi sátte Aqmola oblysynyń Birjan sal aýdanynda órt sóndirýshiler qurǵaq shóp órtimen arpalysyp jatyr. Sońǵy málimet boıynsha, tilsiz jaý 1 100 gektar jerge jaıylǵan. Sekýndyna 7 metrge deıin jyldamdyqpen soqqan jel men aýa temperatýrasynyń +38 gradýsqa deıin kóterilýi órt sóndirý jumystaryn qıyndatyp jatyr.
