Býrabaıdaǵy Kishi Shabaqty kólinde mobıldi qutqarý beketi ashyldy

BÝRABAI. QazAqparat – Aqmola oblysynyń Býrabaı aýdanyndaǵy Kishi Shabaqty kóliniń jaǵasynda shomylý maýsymy bastalar aldynda mobıldi qutqarý beketi ashyldy, dep habarlaıdy QazAqparat tilshisi oblystyq TJD baspasóz qyzmetine silteme jasap.

«Jyl saıyn jazǵy maýsym kezinde oblys aýmaǵyndaǵy sý aıdyndarynda qaıǵyly jaǵdaılardyń aldyn alý úshin qutqarý beketteri ashylady. Sondaı sý aıdyndarynyń biri - Kishi Shabaqty kóli. Munda qutqarýshylar aspaly motory bar qaıyq, jyljymaly tirkeme, avtonomdy elektr jáne jylý generatory sııaqty qural-jabdyqtarmen qamtamasyz etilgen», – deıdi oblystyq TJD «ÓS jáne AQJQ» mekemesi bastyǵynyń orynbasary, jedel qutqarý jasaǵynyń jetekshisi Dáýlet Shamıǵanov.

Eske sala keteıik, oblys aýmaǵynda bes qutqarý beketi bar. Olar Býrabaı, Zerendi aýdandary jáne Kókshetaý qalasynyń kólderinde ornalasqan. Onda 61 kásibı qutqarýshy jumys isteıdi.

Budan bólek, taǵy 105 qutqarýshy men 35 maýsymdyq qoǵamdyq qutqarý beketi bar.