Býrabaıdaǵy emdeý-saýyqtyrý kesheniniń qyzmetkerleri jappaı ekpe alýda

KÓKShETAÝ. QazAqparat – Aqmola oblysynyń Býrabaı kýrortynda ornalasqan elimizge tanymal «Oqjetpes» emdeý-saýyqtyrý kesheniniń qyzmetkerleri koronavırýs ınfektsııasyna qarsy jappaıy ekpe alýda. Bul týraly atalmysh mekemeniń personaldar boıynsha qyzmet bóliminiń basshysy Gúlnár Ǵabdrahmanova málim etti, dep habarlaıdy QazAqparat tilshisi.

Onyń aıtýynsha, búgingi tańda emdeý-saýyqtyrý kesheninde qyzmetshilerdi jappaı vaktsınatsııalaý boıynsha nátıjeli jumystar júrzilýde. Osy rette, «Spýtnık V» jáne Hayat Vax vaktsınalary qoldanylyp otyr.

«Koronavırýs ınfektsııasynyń taralýyn toqtatýdyń jalǵyz joly - ol ujymdyq ımýnıtet qalyptastyrý, ıaǵnı jappaı vaktsına saldyrý. Adamdarmen únemi tyǵyz baılanysta bolatyn «Oqjetpes» emdeý-saýyqtyrý kesheniniń qyzmetkerleri de osyǵan erekshe mán berip otyr. Sol sebepti, bizdiń ujymdaǵy 260 adamnyń 251-i koronavırýske qarsy vaktsınanyń birinshi komponentin aldy. Al, 248 adam ekinshi komponentin kútip otyr. Negizinen «Spýtnık V» jáne Hayat Vax vaktsınalary qoldanylýda. Ekpe alǵandardyń 90 paıyzy «Spýtnık V» vaktsınasyn saldyrtty. Jaqyn arada emdeý-saýyqtyrý keshenindegi ekpe salýǵa densaýlyǵy keletin barlyq personal vaktsına alatyn bolady», - dedi Gúlnár Ǵabdrahmanova.

Sonymen birge, ol qalǵan 9 qyzmetshi medıtsınalyq anyqtamasyna baılanysty vaktsına almaǵanyn, basshylyq tarapynan túsindirý jumystary júrgizilip, qyzmetshilerdi barynsha yntalandyrý sharalary qolǵa alynǵanyn atap ótti.

«Bizdiń qyzmetkerlerdiń alǵashqysy naýryz aıynda ekpe aldy. Vaktsına saldyrǵan ár qyzmetshiniń eńbekaqylaryna 30 paıyz aqsha qosyp otyrmyz. Osynyń arqasynda jumysshylarymyz belsendilik tanytyp, jaqyn kúnderi naýqandy aıaqtaý josparlanǵan», - dep tolyqtyrdy Gúlnár Ǵabdrahmanova.

Aıta keteıik, bıylǵy jylǵy aqpan aıynan bastap óńirde 245 myńǵa jýyq adamǵa vaktsınanyń birinshi komponenti, 189 myńnan astam adamǵa ekinshi komponenti egildi. Osy rette, oblysta 133 egý pýnkti, sondaı-aq 135 mobıldi brıgada jumys isteýde.