Býrabaıdaǵy altyn óndirý zaýyty bir myńǵa jýyq adamdy jumyspen qamtıtyn bolady

KÓKShETAÝ. QazAqparat – Aqmola oblysynyń Býrabaı aýdanynda salynyp jatqan jańa altyn óndirý fabrıkasy bir myńǵa jýyq adamdy jumyspen qamtıtyn bolady. Bul týraly jýrnalıstermen brıfıng ótkizgen aýdany ákimi Áset Muzdybaev aıtty, dep habarlaıdy QazAqparat tilshisi.

Aýdan ákiminiń aıtýynsha, aýdanda jyl basynan beri áleýmettik-ekonomıkalyq negizgi kórsetkishterdiń ósimi, ónerkásip salasy boıynsha – 101,1, aýyl sharýashylyǵy boıynsha – 111,8, ınvestıtsııa tartý boıynsha – 105,6, turǵyn úı salý boıynsha – 155,3 paıyzǵa jetti.

Indýstrııalyq-ınnovatsııalyq damý strategııasyn iske asyrý barysynda 48,9 mıllıard teńge somasyna ónerkásiptik óndiris kólemi qamtamasyz etildi. Ónerkásip óniminiń naqty kólem ındeksi 101,1 paıyzdy qurady.

«Óndiris kóleminiń ósýi óńdeý ónerkásibi óniminiń 15,4 paıyzǵa, onyń ishinde metallýrgııa ónerkásibinde 19,4 paıyzǵa, tamaq ónimderiniń óndirisi 13 paıyzdan astamǵa ulǵaıýy esebinen qamtamasyz etildi. Osy rette, aýdanda «RG Processing» seriktestiginiń jyldyq qýaty 5 mıllıon tonna rýdany quraıtyn altyn óndirý fabrıkasynyń qurylysy júrgizilýde. Kásiporyn iske qosylǵan kezde 1 myń jańa jumys orny qurylatyn bolady, – dedi aýdan ákimi óz sózinde.

Sonymen birge, aýdanda jeke ınvestıtsııalar kólemi byltyrǵy jylmen salystyrǵanda 25,6 paıyzǵa ulǵaıyp otyr.