Býrabaıdaǵy Abylaı han alańynda «Samuryq qusymen» ushýǵa bolady
«Býrabaı Damý» jaýapkershiligi shekteýli seriktestigindegi atalmysh nysandy qurastyrýshylardyń aıtýynsha, mundaı mýltımedııalyq ınteraktıvti keshenniń Qazaqstanda balamasy joq.
«Qazirgi tańda keshen arqyly elimizdiń jáne halqymyzdyń tarıhyna shynaıy enýdi sezinýge bolady. Jańa tehnologııalardyń kómegimen 5D formatynda qyzyqty saıahat jasaý jáne elimizdiń tarıhyna ený múmkindigi bar», - dep bólisti marketıng jónindegi menedjer Ásem Muqymova.
Keshen birneshe mýltımedııalyq zaldar men attraktsıondardan turady. Solardyń biri - Qazaqstandaǵy jalǵyz mýltımedııalyq ómir aǵashy ósetin «Máńgilik El». Bul shejireniń bir túri. Avtorlar mádenıetti jáne uly tarıhymyzdy saqtap qalý úshin árbir qazaq óziniń shyǵý tegin, óz rýy men júzin bilýi tıis dep esepteıdi.
«Ómir aǵashy» ár qazaqtyń rý-taıpalyq quramy týraly barlyq aqparatty kórneki túrde kórsetedi. Ol jaryq shoýy arqyly kórsetiledi», - dep tolyqtyrdy «Býrabaı Damý» jaýapkershiligi shekteýli seriktestiginiń mamandary.
Sondaı-aq, mýltımedııalyq keshenge kelýshiler «Samuryq qusynyń ushýy» attraktsıonynda bola alady, onda «Samuryq qusynyń» sońynan ere otyryp, barlyǵy Qazaqstan boıynsha vırtýaldy ushý-saıahattyn jasaı alady.
«Ushý kezinde siz elimizdiń eń ekzotıkalyq jerlerine baryp, onyń tabıǵatymen, Qazaqstannyń qazynasyn quraıtyn kıeli obektilermen tanysasyz. Bul sizdi kútetin nárseniń az ǵana bóligi», - dep qosty A.Muqymova.
Búgingi kúni keshen «Ashyq» baǵdarlamasy boıynsha jumys isteıdi, jumys kúnderi 10:00 – den 18:00-ge deıin, demalys kúnderi-20:00-ge deıin.
Menedjerdiń aıtýynsha, sessııalar ár jarty saǵat saıyn ótedi. Bir sessııaǵa 10-12 kelýshige ruqsat etiledi. Uıymdastyrýshylar jeńildikter de qarastyrǵan. 6 jasqa deıingi balalar, jetim balalar, ata-anasynyń qamqorlyǵynsyz qalǵan balalar, jetim balalar men ata – anasynyń qamqorlyǵynsyz qalǵan oqýshylar men stýdentter, múgedek balalar, UOS ardagerleri, 1,2,3 toptaǵy múgedekter, «Kúmis alqa» jáne «Altyn alqa» ıegerleri keshenge tegin bara alady.
