Býrabaıdaǵy RIXOS qonaqúıi otshashý uıymdastyrǵany úshin jaýapqa tartyldy
ASTANA. KAZINFORM — Aqmola oblysynyń Tótenshe jaǵdaılar departamenti órt qaýipsizdigi talaptaryn buzǵan tulǵalarǵa qatysty tıisti sharalar qabyldady.
«Býrabaı» memlekettik ulttyq tabıǵı parkiniń (MUTP) irgeles aýmaǵynda, atap aıtqanda, RIXOS LAKE BOROVOE qonaqúıiniń aýmaǵynda pırotehnıkalyq buıymdar qoldanylyp, otshashý uıymdastyrylǵan.
Ormandy alqapta atylǵan otshashý beınelengen vıdeo áleýmettik jelilerde tarap, kópshiliktiń narazylyǵyn týǵyzdy.
Órt shyǵý qaýpi joǵary kezeńde jeldi aýa raıyna qaramastan pırotehnıkalyq buıymdardy (salıýtterdi) qoldanýǵa ruqsat bergeni úshin RIXOS LAKE BOROVOE qonaqúıiniń ıesi, sondaı-aq pırotehnıkalyq buıymdardy iske qosqan uıym Qazaqstan Respýblıkasynyń Ákimshilik quqyq buzýshylyq týraly kodeksiniń 410-babynyń 1-bóligi boıynsha ákimshilik jaýapkershilikke tartyldy.
Aqmola oblysynyń Tótenshe jaǵdaılar departamenti órt qaýpi joǵary kezeńde qaýipsizdik talaptaryn qatań saqtaýǵa shaqyrady. Órt shyǵý qaýpin týdyrýy múmkin jerlerde ashyq ot pen pırotehnıkalyq buıymdardy paıdalanýǵa jol bermeý qajet.
Qaýipsizdik talaptaryna jaýapkershilikpen qaraý — tabıǵatty, múlikti jáne adam ómirin saqtaýdyń kepili.
Aıta keteıik, buǵan deıin Shymkentte júrip kele jatqan kólikten otshashý atqan azamat jaýapqa tartylǵan bolatyn.
