Býrabaıdaǵy orman alqaby ulǵaıady
KÓKShETAÝ. KAZINFORM - «Býrabaı» memlekettik ulttyq tabıǵı parkinde bıyl 520 myń túp tal egý josparlanyp otyr. Osylaısha, orman alqaby jas kóshetterdiń esebinen 65 gektarǵa ulǵaıýǵa tıis.
Ulttyq park qyzmetkerleri byltyr da 500 myńnan astam qaraǵaı men qaıyń óskinin otyrǵyzǵanyn aıta keteıik. Kóshetter parktiń 1960 jyly ashylǵan tálimbaǵynda ósiriledi. Qaıyń men qaraǵaıdan bólek, munda qaraqat, alma, tańqýraı, úıeńki jáne bóriqaraqat syndy aǵashtar egiledi.
- Jyl saıyn ınspektorlar qarasha aıynan qańtarǵa deıin ormannan qaraǵaıdyń búrshigin teredi. Bul jumys bıyl da ýaqtyly júrgizildi. Jınalyp, birneshe kún keptirilgen tuqym qazir tálimbaqtaǵy temperatýrasy men dymqyl deńgeıi retteletin jabyq orynda, arnaýly kameralarda saqtaýly tur. Kóktemge salym búr jara bastaǵan búrshikterdi topyraqqa seýip, tyńaıtqysh salý, aramshóbin tazalaý syndy agrotehnıkalyq jumys júrgizip, eki jyl baptaımyz. Sodan keıin ǵana tamyr jaıa bastaǵan, sabaǵy birneshe santımetrge jetken óskin jabaıy tabıǵat aıasynda ósirýge bolady, - deıdi Ulttyq parktiń orman men ósimdikter álemin qorǵaý jáne jandandyrý bóliminiń bastyǵy Aleksandr Kovalev.
Onyń aıtýynsha, ádette, kóshet sáýir aıynyń sońyna qaraı egiledi. Názik óskin jańa topyraqty jersinýi úshin tálimbaqtan tamyryndaǵy mıkroflorasymen birge ákelip otyrǵyzady.
Memleket basshysynyń tapsyrmasy boıynsha elimizde 5 jylda 2 mlrd túp aǵash otyrǵyzý týraly keshendi jospar júzege asyrylyp jatqany belgili. QR Prezıdentiniń Іs basqarmasyna qarasty mekeme de ony júzege asyrýǵa úles qosyp keledi.
