«Baldáýren» ortalyǵynda balalar sanıtarlyq talaptarǵa saı emes, tar jerde turyp kelgen

KÓKShETAÝ. KAZINFORM - Býrabaı aýdanynyń prokýratýrasy «Baldáýren respýblıkalyq oqý-saýyqtyrý ortalyǵy» RMQK qyzmetine tekserý júrgizip, sanıtarlyq-epıdemıologııalyq talaptardyń júıeli buzylýyn jáne lagerdiń jobalyq qýatynyń asyra paıdalanylǵanyn anyqtady.

Aqmola oblystyq prokýratýrasynyń málimetterine qaraǵanda, tehnıkalyq pasportqa sáıkes, ortalyq 400 orynǵa arnalǵan. Alaıda is júzinde bir aýysymda 574 bala ornalastyrylǵan, bul ruqsat etilgen normadan 43%-ǵa artyq.

Balalardy ornalastyrý úshin 12 oqý kabıneti paıdalanylǵan. Bul bólmeler sanıtarlyq toraptarmen jabdyqtalmaǵan, gıgıenalyq talaptarǵa saı kelmeıdi jáne kámeletke tolmaǵandardyń densaýlyǵyna qaýip tóndiredi. Norma boıynsha bir bólmede 6 bala bolýy tıis bolsa, is júzinde 9 balaǵa deıin ornalastyrylǵan.

Aıryqsha nazar aýdartatyny – memlekettik kvota esebinen tegin demalyp jatqan balalar tar jáne qolaısyz bólmelerde ornalassa, al aqyly negizde kelgen balalar bólek, barlyq jaǵdaıy jasalǵan bólmelerge jaıǵastyrylǵan.

- Anyqtalǵan zańbuzýshylyqtardy joıý, kináli tulǵalardy jaýapqa tartý jáne bolashaqta balalardyń ómiri men densaýlyǵyna qater tóndirmeý úshin prokýrorlyq qadaǵalaý sharalary qabyldandy,- delingen habarlamada.

Osyǵan deıin Almaty prokýratýrasynyń Memlekettik kirister departamenti ǵımaratynyń bir bóligin qaıtaryp alǵany týraly jazdyq.