Býrabaıda «Jaılaý» etnoaýyly ashyldy
KÓKShETAÝ. QazAqparat - Aqmola oblysynyń Býrabaı kýrortynda «Jaılaý» etnoaýyly ashyldy, dep habarlaıdy QazAqparat tilshisi.
Aqmola oblysynyń «VISITAQMOLA» týrıstik aqparat ortalyǵynyń málimetinshe, etnoaýyldyń ashylýynda kýrortty aımaqtyń turǵyndary men qonaqtary sadaq atyp, salt atpen júrip, qolóner sheberleriniń sheberlik synyptaryna qatysyp, nomadtardyń dástúrine qanyǵý múmkindigin aldy.
Sondaı-aq, qazaq kúresi, báıge, asyq atý, aýdaryspaq sııaqty ulttyq sport oıyndaryn tamashalady. «QymyzFest» qymyz festıvali ótip, jergilikti óndirýshilerdiń eń dámdi, sapaly qymyzdary usynyldy. Sharanyń tartymdy tusy 600 myń teńge syılyq qory bar «Báıge-2019» at jarysy boldy. Onda shabandozdar alaman báıge, top báıge jáne eki qysqa qashyqtyqqa shabý arqyly myqtylardy anyqtady.
Sharaǵa Aqmola oblysy ákiminiń orynbasary Marat Iǵalıev qatysyp, kýrortty óńirde jazǵy maýsymnyń ashylýymen jergilikti turǵyndar men qonaqtardy quttyqtap, jazǵy demalystaryn jaqsy ótkizýge tilektestigin bildirdi.
Budan bólek, «Aqmola barysy» qazaq kúresinen beldesýler ótti. Boz kilemge oblystyń ár óńirinen jınalǵan kileń myqtylar shyǵyp kúresti. Jeńimpazdar arnaıy dıplom jáne aqshalaı syılyqtarmen marapattaldy. Al, eń úzdik eki palýan «Qazaqstan barysy» respýblıkalyq týrnırine qatysatyn boldy.
«Býrabaı Damý» seriktestiginiń dırektory Rýslan Ádilovtyń aıtýynsha, sharanyń maqsaty, óńirdiń baı mádenıetin kórsetip, ulttyq sport túrlerin keńinen nasıhattaý.
«Qatysýshylardyń barlyǵy kóshpendiler álemine saıahat jasaǵandaı boldy. Salt atpen serýendep, ulttyq taǵamdardan dám tatty jáne ulttyq sport túrlerin tamashalady. «Jaılaý» etnoaýyly týrıstik maýsym kezinde jumys isteıdi. Keıin jyl boıy jumys isteıtin bolady», deıdi Rýslan Ádilov.
