Býrabaıda jas ǵalymdardyń halyqaralyq forýmy ótti
«Burabay Forum: Qazaqstannyń halyqaralyq yntymaqtastyǵy» taqyrybynda ótken forýmǵa Elbasy Qorynyń atqarýshy dırektorynyń orynbasary Igor Rogov, Qazaqstan Respýblıkasynyń Bilim jáne ǵylym vıtse-mınıstri Talǵat Eshenqulov, Kazakh Tourizm ulttyq kompanııasynyń jetekshisi Rashıd Kúzembaev, Aqmola oblysy ákiminiń orynbasary Qanat Ydyrysov, TMD jáne elimizden kelgen jas ǵalymdar qatysty.
Forýmda elimizdiń eýrazııalyq keńistiktegi bolashaǵy aıtyldy. Sondaı-aq, týrızm, aýyl sharýashylyǵy, ǵylym men mádenıet, fızıka jáne ǵylymdy qajet etetin tehnologııalar salasyndaǵy yntymaqtastyqty odan ári damyta túsýge qatysty óz pikirlerin ortaǵa saldy. «Keleshekte ǵylymdy qaı baǵytta damytý qajet, osy iste jas ǵalymdardyń róli qandaı bolmaqshy?» degen saýaldar tóńireginde kóptegen oılar aıtyldy. Forýmnyń ótkizilýine ótken jyly Elbasy Qory men Aqmola oblysynyń ákimdigi arasynda yntymaqtastyq jónindegi memorandým sebep bolyp otyr.
Aıta keteıik, forým tamyz aıynyń 8-i kúni elordamyz - Astana qalasynda bastalyp, onda birqatar mınıstrlikterdiń ókilderi, joǵary oqý oryndarynyń rektorlary baıandama jasaǵan bolatyn. Kelesi kúni Býrabaıda jalǵasqan forýmnyń plenarlyq otyrysynda elimizdiń túkpir-túkpirinen jáne shetelderden kelgen zertteýshiler spıkerlerge saýaldaryn qoıyp, tushymdy jaýaptar aldy. Jıyndy Qazaqstan Respýblıkasynyń Tuńǵysh Prezıdenti - Elbasy Qorynyń Almaty qalasyndaǵy ókildiginiń dırektory Sergeı Toqtarov ashyp, júrgizip otyrdy. Forým aıasynda ótken sektsııalyq otyrystarda qatysýshylar tájirıbelerimen bólisýge múmkindik aldy. 
Qazaqstan Respýblıkasynyń Bilim jáne ǵylym vıtse-mınıstri Talǵat Eshenqulov buqaralyq aqparat quraldary ókilderine bergen suhbatynda búgingi tańda ǵylym salasyn damytýǵa elimizde zor kóńil bólinip otyrǵandyǵyn, memleketimizde jas ǵalymdardy áleýmettik qorǵaý jaqsy jolǵa qoıylǵandyǵyn aıtyp ótti. Olarǵa Qazaqstan Respýblıkasy Bilim jáne ǵylym mınıstrliginiń bastamasymen ótken jyly jáne bıyl 120 páterdiń kilti tapsyrylǵan eken.
«Elimizdegi ǵylymdy damytý, qarjylandyrý júıesi basqa elderge qaraǵanda edeýir alda kele jatyr dep nyq senimmen aıta alamyn. Forýmǵa shetelderden kelgen meımandar bizdiń júıemizdi zertteýge qyzyǵýshylyq tanytyp otyr», - dedi vıtse-mınıstr Talǵat Eshenqulov.
Forým sońynda barlyq qatysýshylarǵa sertıfıkattar tabys etilip, Býrabaıdyń kórikti jerlerine saıahat uıymdastyryldy.
