Býrabaıda janarmaımen júretin sý kóligine shekteý qoıylmaq
ASTANA. KAZINFORM — Býrabaıda «Pana Sayakhat» eko-kólik júıesi iske qosyldy. Endi týrısterdi elektr kemeleri tasymaldaıdy, dep habarlaıdy Kazakh Tourism UK baspasóz qyzmeti.
Býrabaı kólinde «Pana Sayakhat» jańa kólik júıesiniń bastapqy kezeńi iske qosyldy. Bul bastama ulttyq parkke túsetin avtokólik júktemesin azaıtyp, týrısterge ekologııalyq taza qatynas joldaryn usynýdy kózdeıdi.
Joba aıasynda parktiń júktemesi kóp aýmaqtarynan tys, birinshi kezekte Aınakól mańynda aralyq avtoturaqtar ashylyp, saıahatshylarǵa jeke kóligin syrtta qaldyrýǵa jáne park ishinde eko-transportpen qatynýǵa jaǵdaı jasalady.
Jańa júıeniń basty negizi — elektr kemeleri. Alǵashqy sý baǵyty Aınakól men Bólektaýdy baılanystyrady. Aldaǵy ýaqytta aralyq aıaldamalary bar aınalma baǵyt ashý josparlanǵan.
— Demalys kúnderi Býrabaıǵa aptasyna 30 myńǵa jýyq kólik kiredi. Tek Bólektaý baqylaý alańyna kún saıyn 5 myńnan astam adam keledi, olardyń kóbi — jeke kólikpen. Ulttyq park ishinde bundaı aǵynǵa jetetin turaq salý múmkin emes. Sondyqtan negizgi kólik aǵynyn syrttaǵy turaqtarǵa jáne qoǵamdyq kólikke baǵyttaý qajet, — dep atap ótti joba uıymdastyrýshylary.
Jańa sý kóligi tolyǵymen elektr qýatymen jumys isteıdi. Bul atmosferaǵa zııandy zattardyń bólinýin jáne kól sýynyń otyn qaldyqtarymen lastaný qaýpin joıady. Kelesi jyldan bastap Býrabaı kólinde dástúrli janarmaımen jumys isteıtin sý kólikterin shekteý kózdelgen.
Bastapqy kezeń júıeni tolyq iske qosqanǵa deıin marshrýttardy ońtaılandyrýǵa, qaýipsizdik talaptaryn jetildirýge jáne jolaýshylar aǵynyn baǵalaýǵa múmkindik beredi.
Osyǵan deıin Bektenov Kaspıı jaǵasynda salynatyn keme jasaý zaýytynyń jobasyn qaraǵanyn jazǵanbyz.
