Býrabaıda jańa meshit ashyldy
Aǵashtan salynǵan meshittiń eski ǵımaraty órtten qırap qalǵandyqtan, Býrabaı kentiniń turǵyndary men qonaqtary shamamen bir jyldaı meshitke bara almady. Jańa meshittiń ǵımaraty QR Prezıdentiniń Іs basqarmasynyń bastamasymen qaıyrymdylyq qorynyń esebinen jylǵa jýyq ýaqytta salynyp bitti.
Meshittiń ashylý saltanatyna Qazaqstannyń bas múftıi Serikbaı qajy Oraz jáne Aqmola oblysynyń ákimi Málik Myrzalın qatysty.
«Bıylǵy jyl bizdiń oblys úshin, aıtýly oqıǵalarǵa toly boldy. Astananyń 20 jyldyǵymen qatar, Ereımentaý, Sandyqtaý, Esil aýdandarynyń mereıtoılary atalyp ótýde. Sonymen qatar óńirlerde áleýmettik nysandar paıdalanýǵa berildi. Atap aıtsaq, Tselınograd aýdany, Aqmola aýylynda tuńǵysh Prezıdent saıabaǵy men mádenı saýyqtyrý ortalyǵy ashyldy. Odan bólek, Sandyqtaý aýdany, Maksımovka aýylynda jańa murajaı, Birjan sal aýdanynda jańa mektep ashyldy. Osyndaı aıtýly sharalardyń qataryn Býrabaı aýdanynyń 90 jyldyǵy tolyqtyrdy. Búgin mine, aýdannyń mereıtoıy qarsańynda jańa meshit paıdalanýǵa berilip otyr. Qazaqstan kópkonfessııaly memleket jáne din máselesine kóp kóńil bóledi. Biz úshin barlyq ulttar arasyndaǵy túsinistik, beıbitshilik pen kelisim memleket saıasatynyń basty strategııasy. Meshittiń ásem bezendirilýi men erekshe sáýleti kóz qýantady. Bul Býrabaı kentiniń halqyna tamasha tartý. Jańa meshit el ıgiligi úshin qyzmet etip, jas urpaqty izgi qasıetterge tárbıeleıdi dep senemin», - dedi Aqmola oblysynyń ákimi Málik Myrzalın.
Jalpy alańy 1659 sharshy metrdi quraıtyn, 150 oryndyq meshit úsh qabattan turady, sonyń ishinde erler men áıelderge arnalǵan eki ǵıbadat bólmesi, kitaphana, ımamnyń kabıneti, 140 oryndyq qatymhana (as beretin zal) bar. Kelýshilerge qolaıly bolý úshin ǵımarattyń aınalasynda avtoturaq, gúlzarlar jáne jaıaý júrginshi joldary jasalǵan.
«Eldigimizdiń, birligimizdiń naqty aıǵaǵy retinde biz musylman dinin ustanǵan jáne sol babalardyń izin jalǵastyrýshy retinde qandaı ásem meshitter salyp jatyrmyz. Búgin Býrabaıdyń mereıtoıymen birge, elimizdiń kórikti jeri men arhıtektýrasy urpaqtan urpaqqa tarıhı mura bolyp qalatyn rýhanı izgiliktiń kýási bolyp otyrmyz. Jańa esigin ashqan Allanyń úıi bizdiń urpaqtarymyzǵa, elin, jerin, Otanyn súıýge jáne ulttyq qundylyqtarǵa tárbıeleýge sebepker bolsyn», - dedi Qazaqstan musylmandary dinı basqarmasynyń tóraǵasy, Bas múftı, Serikbaı qajy Oraz.
