Býrabaıda tutanǵan órt Smart júıeniń kómegimen jyldam sóndirildi

NUR-SULTAN. QazAqparat – Býrabaıda demalýshylar túnde alaý jaǵyp, Kókshetaý (Sınıýha) bıiginde órt shyqty. Jalyndy Smart Burabay monıtorıng júıesi tirkep, ulttyq park ınspektorlaryna naqty koordınattary berilgen. Bul týraly Prezıdent Іs basqarýshysy Aıbek Dádebaev telegram kanalynda jarııalady, dep habarlaıdy QazAqparat.

«Keshe túnde, saǵat 23:30-da Prezıdent Іs Basqarmasyna qarasty Smart Burabay monıtorıng júıesi Sınıýha taýyndaǵy órtti tirkedi. PІB dıspetcherleri órttiń naqty koordınattaryn shuǵyl eseptep, olardy Býrabaı ulttyq parkiniń ınspektorlaryna berdi», - deıdi Aıbek Dádebaev.

Býrabaı orman sharýashylyǵynyń qyzmetkerleri taý basyna bir saǵatta shyqqan. Sebebi, bul taýǵa kúndizdiń ózinde shyǵý qıyn, al túnde tipti tastarǵa janasyp kóterilýge týra kelgen.

Belgili bolǵanyndaı, órt túngi alaýdan tutanǵan. Tolyǵymen sóndirildi. Al, Býrabaı kýrortyna demalýǵa barǵan úsh saıahatshyǵa QR ormandaryndaǵy qaýipsizdik erejelerin buzǵany úshin 306 300 teńge aıyppul salynady. Atap aıtqanda, Ákimshilik quqyq buzýshylyq týraly kodekstiń 367-baby 3-bóliginde 100 AEK kóleminde aıyppul qaralǵan. Eger ol bir apta ishinde tólense, onda somanyń jartysy qysqarady.

Aıta ketsek, Smart National Park Burabay júıesi 2020 jyldyń 1 jeltoqsanynda iske qosyldy. Ol Býrabaı ulttyq parkiniń kókjıegin túgeldeı, ıaǵnı 129 myń ga astam aýmaqty avtomatty túrde baqylaı alady.

Bul júıeniń jumys prıntsıpi medıtsınalyq tomograf ispetti. Kamera sheńber boıymen qozǵalyp, ár aınalymda fotosýretter túsiredi. Qaýipti jerler bolsa, qyzyl kontýrmen belgilenip, jedel basqarý ortalyǵynyń pýltine sıgnal beredi. Bul jumys onlaın rejımde júrgiziledi.

Ortalyq operatorynyń túsirilgen kadrlardy jaqyndatyp qaraýǵa múmkindigi bar. Ol qaýiptilik dárejesin taldap, naqty koordınattardy anyqtaıdy. Munan keıingi is-qımyl jaǵdaıǵa qaraı qabyldanady. Máselen, órt tutanǵan bolsa, Smart júıemen dál kórsetilgen orynǵa Býrabaı ulttyq parkiniń brıgadasy jiberiledi.

Aıbek Dádebaevtyń aıtýynsha, osy zamanaýı aqparattyq júıe iske qosylǵan alǵashqy jyly órtten keltirilgen zalal 16 ese azaıǵan. 2020 jyly órttiń ortasha aýdany - 84 ga, al áreket etý ýaqyty - 30 mınýt bolsa, 2021-de órt aýmaǵy 6 esege, áreket etý ýaqyty 10 mınýtqa deıin qysqardy.

«Býrabaı» ulttyq parki – erekshe qorǵalatyn aýmaqtardyń tabıǵı baılyǵyn saqtaý úshin sandyq monıtorıng júıesin tabysty paıdalanatyn eldegi jalǵyz saıabaq.

«Atalǵan júıe órtterdi ǵana emes, sonymen qatar ulttyq parktegi basqa da qaýipti quqyq buzýshylyqtardy tirkeıdi. Biz bul jobanyń múmkindikterin keńeıtkimiz keledi jáne aýdandyq ákimdikterge kúzet aýmaǵyn monıtorıngileý úshin uıaly baılanys operatorlarynyń munaralaryna kameralar ornatýdy qarastyrý jóninde hattar joldadyq», - dep túıindeıdi Prezıdent Іs basqarýshysy.