Býrabaıda týrızm maýsymynyń ashylýyna daıyndyq júrgizilýde
KÓKShETAÝ. QazAqparat - Aqmola oblysynyń ákimi Málik Myrzalınniń tóraǵalyǵymen Býrabaı kýrortynyń jazǵy maýsymǵa daıyndyǵy pysyqtalǵan májilis ótti, dep habarlaıdy QazAqparat tilshisi ákimdiktiń baspasóz qyzmetine silteme jasap.
Oblystyq basqarmalar men vedomstvolardyń basshylary, «Býrabaı» ulttyq parki men týrıstik bıznes ókilderi qatysqan jıynda aldymen Býrabaı aýdanynyń ákimi Qanat Qaraýylovtyń esebi tyńdaldy. Onyń aıtýynsha, kýrortty óńirde jyldan jylǵa týrıstik ınfraqurylymdardyń sany artyp keledi. Máselen, aǵymdaǵy jyldyń basynan beri 70 adamǵa arnalǵan «Arheı» saýyqtyrý kesheni qoldanysqa berildi. Sondaı-aq, 100 oryndyq qonaq úı kesheni, otel, mádenı-turmystyq jáne kóńil kóterý nysandarynyń qurylysy aıaqtalýǵa jaqyn. Budan bólek, 14 gektar aýmaqqa áleýmettik-mádenı, sporttyq-saýyqtyrý, saýda-oıyn saýyq, qonaq úı tárizdi týrıstik nysandar salý josparda bar.
Sonymen qatar, «Býrabaı damý» JShS biryńǵaı baılanys ortalyǵynyń basshysy Azamat Baımuqanov pen «Esil» áleýmettik kásipkerlik korporatsııasy» ulttyq kompanııasynyń basshysy Qazbek Eskendirovtyń baıandamalary tyńdaldy.
Jıyndy qorytyndylaǵan aımaq basshysy jazǵy maýsymdy ashýda týrıstik nysandardyń daıyndyǵyn tolyq qamtamasyz etýde jaýapty tulǵalarǵa naqty tapsyrmalar berdi. Oǵan qosa, ІІD men TJD sýǵa shomylý kezinde qaýipsizdik sharalarymen qamtamasyz etýdi júktedi.
Osy kúni Málik Myrzalın «Rýhanı jańǵyrý» baǵdarlamasy boıynsha ashylǵan Býrabaı kentiniń tarıhı murjaıy men «Jaılaý» etno aýylyn aralap kórdi.
