Býrabaıda týrıster qaýipsizdigin jasandy ıntellekt kúzetedi
BÝRABAI. KAZINFORM — Jyl basynan beri Býrabaı kýrorttyq aımaǵyna mıllıonnan astam týrıst kelgen. Aýmaqtyń qaýipsizdigin kúsheıtý úshin jergilikti polıtseıler jasandy ıntellektpen birlese jumys isteýdi bastady. Jańa júıe tolyǵymen otandyq ónim jáne Bas prokýratýra men Іshki ister mınıstrliginiń derekter bazasymen biriktirilgen. Respýblıka boıynsha oǵan Almaty, Atyraý oblystary men Býrabaı aýdany ǵana qosylǵan.
Býrabaı aýdanynyń ákimi Araı Sadyqovtyń aıtýynsha, aýdanda 79 jańa kamera TargetAI ıntellektýaldy baǵdarlamasymen ıntegratsııalandy. Bul qurylǵylarda adamnyń bet-júzin taný, kólikterdi izdeý jáne memlekettik nómir boıynsha baqylaý múmkindigi iske qosylǵan. Tipti kóliktiń júrip ótken marshrýtyn jınaqtap bere alady.
– Eger týrıst nemese kishkentaı bala joǵalyp ketse, onyń sıpattamasyn tolyq engizýge bolady. Qyzyl jeıde, qara shalbar kıgen, 6-7 jasar balany tabý týraly komanda berilse, jasandy ıntellekt sol sıpattamaǵa saı keletin adamdardy kórsetedi. Jasandy ıntellekt adamdy qaı jerde júrgenin, qaı kólikpen júrgenin tolyq tabýǵa kómektesedi: memlekettik nómirdi engizip, kóliktiń qala ishinde qaı baǵytpen ketkenin nemese qaladan shyqqanyn anyqtaı alamyz, – dedi aýdan ákimi tilshilerge bergen suhbatynda.
Sonymen birge, aqyldy júıe Іshki ister mınıstrliginde probatsııalyq baqylaý men esepte turǵan, izdeý jarııalanǵan adamdardyń, zańsyz mıgranttardyń bet-júzin tanıdy. Olar aýdan aýmaǵyna kirse, polıtsııa bóliminiń qyzmetkerleri muny birinshi bolyp biledi. Olar mekteptiń qasynan ótse, adam kóp jınalatyn oryndarǵa barsa, júıe belgi berip otyrady.
– Bıyl Memleket basshysy sýperkompıýterdi iske qosty jáne biryńǵaı ulttyq beınebaqylaý júıesi ázirlenýde. Býrabaı aýdanynyń júıesi osy ıntegratsııaǵa daıyn. Jasandy ıntellekt júıesi iske qosylǵaly 1200-den astam ákimshilik quqyqbuzýshylyq anyqtaldy. Qazir biz júıege tútin anyqtaý fýnktsııasyn da qosyp jatyrmyz. Bizde 63 ese úlkeıtetin eki úlken kamera bar. Qalada tútin paıda bolsa, tótenshe jaǵdaılar departamentimen birlesip, jedel áreket ete alamyz, – deıdi aýdan ákiminiń orynbasary Mereı Ramazanuly.
Júıe fýnktsııalary áli jetildirilip keledi. Mysaly, ákimdik qansha kólik kirgenin anyqtaý fýnktsıonalyn qosyp, týrıster aǵynyn saralap, qaı óńirden qandaı kontıngent keletinin anyqtaýdy kózdep otyr.
Turǵyndar ruqsat etilmegen jerde qoqys tastasa, bul aımaq anyqtalyp, dabyl qaǵylady. Alaıda, mundaı baqylaý úshin kamera sanyn kóbeıtý qajet.
– Qazir bizde 79 jańa jáne 191 burynǵy kamera bar. Ásirese halyq kóp júretin jerler kameramen qamtylǵan. Biz júıeni keńeıtemiz jáne aldaǵy eki aıda taǵy 50 kamerany qosymsha ornatamyz. Aýdandyq polıtsııa, UQK, prokýratýra qyzmetkerlerinen quralǵan arnaıy komıssııa kamera ornatylmaǵan oryndardy anyqtap, júıe jumysyn jaqsartady, – deıdi ákimdik ókili.
Aıta keteıik, Memleket basshysy bıylǵy Joldaýynda jasandy ıntellektti barlyq salalarǵa engizý bastamasyn kóterdi.
Keshe Jaslan Mádıev QR Premer-mınıstriniń orynbasary – Jasandy ıntellekt jáne tsıfrlyq damý mınıstri bolyp taǵaıyndaldy.
Sondaı-aq, Býrabaıda geımıfıkatsııa elementteri bar ekomarshrýt ashyldy.