Býrabaıda trıatlonnan Azııa kýboginiń kezeńdik jarysy máresine jetti (FOTO)
KÓKShETAÝ. QazAqparat - Býrabaıda trıatlonnan Azııa kýboginiń kezeńdik jarysy máresine jetti.
Atalǵan baıraqty básekege Qazaqstan, Reseı, Ózbekstan, Ekvador, Argentına, Japonııa, Taıpeı, Belarýs, Izraıl jáne Germanııa tárizdi memleketterden kelgen trıatlonshylar qatysyp, baq synady.
Oblystyq sport basqarmasynyń málimeti boıynsha jarysta olımpıada joldamasy sarapqa salyndy.
Aldymen jarys jolyna jastar shyqty. Aınakól kóli sýynyń temperatýrasy 11 gradýs deńgeıinde bolǵandyqtan jarystyń tehnıkalyq delegaty fılıppındik Reıchel Rıbo úshsaıysshylardy sýda júzýdiń ornyna qosymsha 2,5 shaqyrym júgirýge almastyrý jóninde sheshim qabyldady.
Osy jarysta qostanaılyq Nıkıta Kýrganskıı men kókshetaýlyq Denıs Týnıtskıı arasynda birinshi oryn úshin kúres tartysty ótti. Sońǵy sátterde qarsylasyn qapy qaldyrǵan Denıs márege 14 sekýnd buryn jetti.
Erler arasynda ótken jarysta qarsylastarynan oq boıy ozǵan germanııalyq trıatlonshy Maksımılıan Shvets birinshi kelse, reseılik Andreı Moıseenko men taǵy bir nemis sportshysy Valentın Vernz ekinshi jáne úshinshi oryndardy ózara bólisti.
Al, áıelder arasynda ótken jarysta Býrabaıda mańyzdy upaı jınaýdy kózdegen argentınalyq Romıno Vıogıolı men ekvadorlyq Elızabet Bravony san soqtyrǵan reseılik Anastasııa Polıanskaıa birinshi orynǵa laıyq dep tanyldy. Ekinshi kelgen Elızabet Bravo olımpıada joldamasyna qol jetkizdi. Argentınalyq Romına Vıogıolı júldeli úshinshi oryndy mise tutty.
Eske sala keteıik, bıylǵy jyldyń maýsym aıynda Kókshetaýda Azııa kýboginiń taǵy bir kezeńi ótedi josparlanǵan. 
