Býrabaıda sýǵa batyp ketken ekinshi boıjetkenniń múrdesi tabyldy
ASTANA. QazAqparat - Şýchınsk-Býrabaı kýrorttyq aımaǵynda Kishi Shabaqty kóline batyp ketken ekinshi boıjetkenniń múrdesi tabyldy, dep habarlady «QazAqparat» HAA tilshisi.
QR ІІM TJK resmı ókili Rýslan Imanqulovtyń habarlaýynsha, múrde búgin saǵat 12.36-da tabylǵan. Eske salsaq, qaıǵyly jaǵdaı týraly kýáger Astana turǵyny Ulan Ábishev áleýmettik jelide habarlaǵan.
Onyń aıtýynsha, eki boıjetken men bir jasóspirim ómiri úshin arpalysqan. Kúrt kóterilgen jelden olardyń úrlemeli matrastary aýdarylyp ketken. Birneshe jas kómekke umtyldy. Tek er balany ǵana alyp shyǵyp úlgerdi. Ókinishke oraı, boıjetkenderdi qutqarý múmkin bolmady. Jastar jaǵaǵa shyǵyp, qutqarýshylarǵa habarlasty, olar bir áreń saǵatta jetti.
«Qutqarýshylar kelgenshe dármensiz kúıde ár qarańdaǵannan úmit kúttik. Áıelder men balalar kóz jastaryna erik berdi. Bul rette kólde kezekshiler, qaıyq, qutqarý jıletteri bolmady», - dep jazdy ol Feısbýktegi paraqshasyna.
Keıinnen habarlamaǵa TJK resmı ókili jaǵajaı shomylýǵa arnalmaǵan, sondyqtan ol jerde qutqarýshylardyń bolmaǵanyn atap ótip, pikirin bildirdi.
