Býrabaıda «SportFEST Kazakhstan» spartakıadasynyń aqtyq kezeńi bastaldy
KÓKShETAÝ. QazAqparat - Aqmola oblysynyń Býrabaı kýrortynda «SportFEST Kazakhstan» respýblıkalyq spartakıadasynyń aqtyq kezeńiniń ashylýy rásimi ótti, dep habarlaıdy QazAqparat tilshisi.
«Baldaýren» respýblıkalyq oqý-saýyqtyrý ortalyǵynda ótip jatqan sharaǵa elimiz boıynsha 2003-2005 jyldary týǵan 7000-ǵa jýyq oqýshynyń arasynda óńirlik saıystarda úzdik shyqqan 561 bala qatysyp, baq synaýda.
Jastar jylyna oraılastyrylǵan sharanyń ashylýyna QR Parlamenti Senatynyń depýtattary Dınar Núketaeva, Narıman Tóreǵalıev, QR Tsıfrlyq damý, qorǵanys jáne aeroǵarysh ónerkásibi vıtse-mınıstri Abylaıhan Ospanov, QR Bilim jáne ǵylym vıtse-mınıstri Elmıra Sýhanberdıeva jáne Aqmola oblysy ákiminiń orynbasary Aına Mysyrálimova qatysyp, quttyqtaý sóz sóıledi.
«Barshańyzdy «SportFEST Kazakhstan» respýblıkalyq spartakıadasynyń aqtyq kezeńiniń ashylýymen quttyqtaımyn. Búgingi tańda dene shynyqtyrý ómirimizdiń ajyramas bóligine aınalyp otyr. Elimizde buqaralyq sportty damytý, jastar men mektep oqýshylarynyń bos ýaqytyn sport zaldary men stadıondarda ótkizýin nasıhattaý boıynsha aýqymdy jumystar júrgizilýde», dedi Aqmola oblysy ákiminiń orynbasary Aına Mysyrálimova.
Uıymdastyrýshylardyń aıtýynsha, spartakıada maýsymnyń 5-ne deıin jalǵasady. Spartakıada uldar arasyndaǵy fýtzal, áskerı qoldanbaly sport túrleri, shahmat, ústel tennısi, qyzdar arasyndaǵy basketbol men toǵyzqumalaq sııaqty sporttyń alty túri boıynsha ótýde.
