Býrabaıda shveıtsarııalyq standart boıynsha týrıstik marshrýt paıda bolady
KÓKShETAÝ. QazAqparat – Şýchınsk – Býrabaı kýrortty aımaǵynda shveıtsarııalyq «Burabay - Switzerland» standarty boıynsha týrıstik marshrýt paıda bolady. Buǵan Aqmola oblysynyń týrıstik salasy men bılik organdarynyń ókilderi jáne Shveıtsarııadan kelgen qonaqtardyń osy maqsatta ornatylǵan belgi taqtaıshany ashý rásimi arqaý bolyp otyr, dep habarlaıdy QazAqparat tilshisi.
Saltanatty shara shveıtsarııanyń ulttyq mýzykalyq aspabymen oryndalǵan sazdy áýenimen ashyldy. Sonymen qatar, qazaqtyń qara dombyrasymen kúı oryndaldy.
Jınalǵan jurt aldynda quttyqtaý sóz sóılegen Qazaqstan Respýblıkasyndaǵy Shveıtsarııa Konfederatsııasynyń Tótenshe jáne Ókiletti elshisi Ýrs Shmıd ekijaqty áriptestik baılanystyń nyǵaıyp kele jatqanyn atap ótti.
«Búgin biz «Kazakh Tourism» UK» AQ men «Switzerland Tourism» kompanııasy arasynda áriptestik týraly qol qoıylǵan memorandým sheńberinde alǵashqy qadam jasap otyrmyz. Bizdiń ekijaqty áriptestigimizdiń basty maqsaty, eki el arasynda tájirıbe almasa otyryp, týrızmdi damytý jáne týrıster sanyn arttyrý. Osy rette, bizder úshin «Qazaqstandyq Shveıtsarııa» atalatyn Býrabaı kýrortynda birlesken jobany júzege asyrý óte qolaıly. Qazaqstanda uzaq jyldar boıy Shveıtsarııanyń qyryqtan astam kompanııasy jumys istep keledi. Shvetsarııada oqıtyn qazaqstandyq stýdentterdiń 95 paıyzy «Qonaqúı týrızmi» mamandyǵy boıynsha bilim alýda. Aldaǵy ýaqytta da ekijaqty áriptestik baılanysty damyta beretin bolamyz. Ol úshin barlyq múmkindik bar», - dedi Ýrs Shmıd óz sózinde.
Al, aımaq basshysynyń orynbasary Marat Iǵalıev mártebeli meımandarǵa Aqmola oblysy ákimi Ermek Marjyqpaevtyń sálemin jetkize kele, Şýchınsk – Býrabaı kýrortty aımaǵyndaǵy shveıtsarııalyq «Burabay - Switzerland» standarty boıynsha týrıstik marshrýttyń alǵashqy belgisi Býrabaıdaǵy Abylaı han alańynda ornatylyp otyrǵanyna erekshe toqtaldy.
Sonymen qatar, sharada «Switzerland Tourism» kompanııasynyń jańa naryq jáne arnaıy jobalar jónindegi dırektory Federıko Sommarýgı, «Býrabaı» MUTS dırektorynyń orynbasary Azamat Baımuqanov jáne «Kazakh Tourism» UK» AQ departamentiniń ókilderi sóz sóıledi.
Aıta keteıik, atalmysh memorandým aıasynda shveıtsarııalyq tarap Qazaqstannyń ulttyq saıabaqtary men taýly jerlerinde jyl boıyna týrızmdi damytýǵa atsalyspaq. Ásirese, shańǵy ınstrýktorlary men taý gıdterin daıarlaýda shveıtsarııalyq standartty engizý jáne beıimdeý qarastyrylyp otyr. Budan bólek, ekijaqty týr ónimderdi jyljytý, aqparat almasý jáne halyqaralyq áriptestikti damytý kózdelgen.
