Býrabaıda sheteldegi qazaq balalaryna arnalǵan «Atameken» quryltaıy ótip jatyr
ASTANA. KAZINFORM – Býrabaıdaǵy «Baldáýren» respýblıkalyq oqý-saýyqtyrý ortalyǵynda «Atameken» halyqaralyq balalar quryltaıy bastaldy.
Qazaqstan Oqý-aǵartý mınıstrliginiń qoldaýymen jáne Dúnıejúzi qazaqtarynyń qaýymdastyǵynyń uıymdastyrýymen júzege asyrylyp jatqan joba aıasynda álemniń 11 elinen kelgen 288 etnıkalyq qazaq balasy eki apta boıy tarıhı Otanynda demalyp, mádenı-tanymdyq jáne tárbıelik baǵdarlamalarǵa qatysady.
Quryltaı barysynda qatysýshylar Býrabaıdyń kórkem tabıǵatymen tanysyp, qazaq halqynyń tarıhy men mádenı murasyn zerdeleıdi. Sonymen qatar ulttyq oıyndar, qolóner jáne óner sabaqtaryna qatysyp, sporttyq jarystarda baq synaıdy, shyǵarmashylyq kezdesýler men tanymdyq ekskýrsııalarǵa barady. Uıymdastyrýshylardyń aıtýynsha, bul joba sheteldegi qazaq balalarynyń ózara tanysyp, dostyq qarym-qatynas ornatýyna, keıin de baılanysyn úzbeı, ana tili men ulttyq qundylyqtardy birge dáripteýine múmkindik beredi.
Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov mundaı jobalardyń sheteldegi qandas balalardyń tarıhı Otanymen baılanysyn nyǵaıtýdaǵy mańyzyn erekshe atap ótti.
– Dúnıejúzi qazaqtary qaýymdastyǵynyń negizgi mıssııasy – balalardy tarıhı Otanymen baılanystyryp, ulttyq tamyryn tereńdetý. Nebári bes baladan bastalǵan bul joba búginde 288 balany qamtyp otyr. Búgingi bala – erteńgi eldiń azamaty. Elge kelgen soń balalar bir-birimen tanysyp, aralasady. Bul – keleshek úshin mańyzdy rýhanı kópir. Bolashaqta Qazaqstanǵa kelip bilim alyp, eldiń damýyna úles qosatyn jastarǵa jol ashylady, – dedi Zaýytbek Turysbekov.
Al Dúnıejúzi qazaqtary qaýymdastyǵy tóraǵasynyń keńesshisi Qarlyǵash Bekpatshaqyzynyń aıtýynsha, joba 2003 jyly nebári jeti balamen bastalyp, búginde aýqymdy halyqaralyq bastamaǵa aınalǵan.
– Ótinish bildirgen qandastardyń arasynan ártúrli salada jetistikke jetken, júldeli oryn alǵan daryndy balalar irikteledi. Bir sózben aıtqanda, júzden júırik, myńnan tulpar atanǵan, saıdyń tasyndaı iriktelgen balalar. Іs-sharanyń basty maqsaty – sheteldegi qazaq balalaryn Atajurtymen baılanystyrý, qazaq halqynyń bolmysyn, salt-dástúrin, tili men mádenıetin tereńirek tanytý. Bıylǵy quryltaıdyń taǵy bir ereksheligi – Qytaıdan kelgen jas aqyndardyń balalarǵa aıtys ónerin kórsetýi, – dedi Qarlyǵash Bekpatshaqyzy.
Bıylǵy quryltaıǵa Mońǵolııadan – 70, Qytaıdan – 60, Ózbekstannan – 50, Reseıden – 45, Qyrǵyzstannan – 35, Túrikmenstannan – 15, Túrkııadan – 4, Aýǵanstan men Irannan úsh-úshten, Tájikstannan – 2 jáne Eýropa elderinen 1 bala qatysyp otyr. Jalpy qatysýshylar sany – 288.
Aıta keteıik, Qazaqstan Oqý-aǵartý mınıstrligi jyl saıyn sheteldegi etnıkalyq qazaq balalarynyń tarıhı Otanynda demalýyna arnaıy kvota bólip keledi. Al Dúnıejúzi qazaqtarynyń qaýymdastyǵy qatysýshylardy irikteý, qujattaryn rásimdeý, jol júrýin uıymdastyrý jáne quryltaı baǵdarlamasyn úılestirý jumystaryn júzege asyrady.
Uıymdastyrýshylardyń pikirinshe, «Atameken» halyqaralyq balalar quryltaıy sheteldegi qazaq balalarynyń ulttyq biregeıligin saqtaýǵa, Qazaqstanmen rýhanı baılanysyn tereńdetýge jáne álem qazaqtarynyń tutastyǵyn nyǵaıtýǵa baǵyttalǵan mańyzdy halyqaralyq joba bolyp qala beredi.
