Býrabaıda patrýldik polıtseıler úsh adamdy qutqaryp qaldy

ASTANA. KAZINFORM – Býrabaı aýdanynyń patrýldik polıtsııa qyzmetkerleri Şýchınsk – Býrabaı tasjolynda bolýy múmkin qaıǵyly jaǵdaıdyń aldyn aldy, - dep jazdy Polisia.kz.

Olardyń jedel ári kásibı áreketiniń arqasynda júrgizýshi men eki jolaýshy aman qaldy. Qyzmet barysynda patrýldik polıtsııa rotasynyń qyzmetkerleri Baýyrjan Ǵalymov pen Aıan Qanǵojın jol boıynda kólikti kúmán týdyrarlyqtaı basqaryp kele jatqan júrgizýshini baıqaıdy. Avtokólik baıaýlap, qarsy baǵyttaǵy jolaqqa shyǵyp, jol jıegine soǵylǵan.

Polıtseılerdiń toqtaý týraly talabyna júrgizýshi jaýap bermegen. Jaǵdaıdy tez baǵamdaǵan tártip saqshylary dereý sheshim qabyldap, qarsy baǵyttaǵy qozǵalysty toqtatyp, kólikti qaýipsiz túrde toqtatty. Osylaısha yqtımal jol-kólik oqıǵasynyń aldyn aldy. Kóliktiń ishinde 60 jastaǵy er adam men eki kámeletke tolmaǵan bala bolǵan. Keıin anyqtalǵandaı, júrgizýshi ózin kenetten jaısyz sezinip, basy aınalyp, jaǵdaıy kúrt nasharlaǵan.

Polıtsııa qyzmetkerleri birden jedel járdem shaqyryp, dárigerlerdiń nusqaýymen er adamǵa alǵashqy medıtsınalyq kómek kórsetti. Kóp uzamaı kelgen medıtsınalyq top júrgizýshini aýrýhanaǵa jetkizdi. Dárigerler onyń jaǵdaıyn «ınsýlt aldy» dep baǵalap, polıtseılerdiń jedel áreketiniń arqasynda aýyr zardaptyń aldyn alǵanyn atap ótti.

Keıinnen 60 jastaǵy er adam óz ómirin saqtap qalǵan patrýldik polıtsııa qyzmetkerlerine rızashylyǵyn bildirdi. - Býrabaı aýdany polıtsııa bóliminiń qyzmetkeri Baýyrjan Ǵalymov pen Aıan Qanǵojınge kásibı sheberlikteri men batyl áreketteri úshin shyn júrekten alǵys aıtamyn, – dep atap ótti ol aýdandyq polıtsııa bóliminiń bastyǵy Arman Bılıalovqa joldaǵan alǵys hatynda.

Aýdandyq polıtsııa basshysy da qyzmetkerleriniń kásibı daıyndyǵy men jaýapkershiligin joǵary baǵalady.

- Baýyrjan Ǵalymov pen Aıan Qanǵojınniń batyldyǵy men jyldam áreketi adam ómirin saqtap qalýǵa múmkindik berdi. Bul – olardyń adaldyǵy men óz isine degen shynaıy berilgendiginiń kórinisi, – dedi Arman Bılıalov.

Patrýldik polıtsııa qyzmetkerleriniń úılesimdi jáne jedel is-qımylynyń arqasynda úsh adam aman qaldy.

Aıta keteıik, Óskemende sýǵa batyp bara jatqan 5 jasar balany stýdent qutqaryp qaldy.