Býrabaıda «Parkter sherýi» halyqaralyq aktsııasy ótti
KÓKShETAÝ. QazAqparat - Býrabaıda «Parkter sherýi-2019» halyqaralyq aktsııasy ótti, dep habarlaıdy QazAqparat tilshisi Aqmola oblysynyń «Visit Aqmola» týrıstik aqparat ortalyǵyna silteme jasap.
«Parkter sherýi - tabıǵatty qorǵaýǵa arnalǵan jyl saıyn ótkiziletin keń kólemdi halyqaralyq aktsııa. Sharaǵa qorǵalatyn tabıǵı aýmaqtardy (qoryqtar, ulttyq saıabaqtar, qoryqshalar men tabıǵı eskertkishter) qoldaý boıynsha kez kelgen adam qatysa alady. Sharanyń basty maqsaty - óskeleń urpaqtyń nazaryn qorshaǵan ortanyń lastanýyna, ekologııalyq jáne erekshe qorǵaýǵa alynǵan tabıǵı aýmaqtardyń máselesine aýdarý», - deıdi vedomstvodan.
Aktsııa sheńberinde «Býrabaı» MUTP aýmaǵynda aýmaqtardy tazalaý jáne abattandyrý, taqyryptyq sabaqtar, sondaı-aq, ekologııa, týrızm jáne orman sharýashylyǵy kolledjiniń stýdentteri men mektep oqýshylarynyń Halyqaralyq jasyl tehnologııalar men ınvestıtsııalyq jobalar ortalyǵymen birlesip ótkizgen ǵylymı jobalarynyń kórmesi uıymdastyryldy.
«Bıyl birinshi ret «Parkter sherýi-2019» halyqaralyq aktsııasynda «Jasyl jol» elektrombılderiniń sherýi ótti. Bul - benzındi qajet etpeıtin, aýany lastamaıtyn, qorshaǵan ortaǵa zııan keltirmeıtin TESLA, JAC, BMW brendti kólikter», - dep tolyqtyrdy «Visit Aqmola» týrıstik aqparat ortalyǵyndaǵylar.
