Býrabaıda ótetin muzda júgirý jarysyna 11 eldiń ókilderi qatysady

ASTANA. KAZINFORM – 14 aqpanda Aqmola oblysyndaǵy «Býrabaı» memlekettik ulttyq tabıǵı parkiniń aýmaǵynda dástúrli qalyń muz aıdynynda júgirýden Burabay Ice 2026 halyqaralyq jarysy ótedi. Іs-shara qysqy maýsymdaǵy halyqaralyq festıval retinde 2026 jylǵa arnalǵan resmı kúntizbege engizilgen.

Uıymdastyrýshylardyń málimetinshe, bıyl jarysqa 1000-nan astam adam qatysady. Tirkelgenderdiń qatarynda Qazaqstannyń ártúrli óńirlerinen bólek, Frantsııa, Ulybrıtanııa, Vengrııa, Kanada, Reseı, Ózbekstan, Italııa, Japonııa, Jańa Zelandııa jáne Perý elderiniń ókilderi bar.

- Muz aıdynynda júgirý belsendi ómir saltyn ustanatyn áýesqoılarǵa da, kásibı sportshylarǵa da arnalǵan. Qatysýshylar 7, 14 jáne 21 shaqyrymdyq qashyqtyqtar boıynsha baq synaıdy, - delingen Kazakh Turizm taratqan aqparatta.

Uıymdastyrýshylardyń aıtýynsha, shara Býrabaı kýrortynyń kórkem tabıǵatynda demalys kúnderin tıimdi ótkizýge múmkindik berip qana qoımaı, óńirdiń týrıstik tartymdylyǵyn arttyrýǵa da yqpal etedi.

Aıta keteıik, Býrabaı ulttyq parkine kirý tarıfi ózgerdi.