Býrabaıda ótetin halyqaralyq «Aıbyn» jıynyna 6 eldiń komandalary qatysady
ASTANA. KAZINFORM — «Aıbyn» halyqaralyq jastar jıynyna qatysýshylardy qarsy alýǵa daıyndyq qyzý júrip jatyr, dep habarlaıdy Qorǵanys mınıstrliginiń baspasóz qyzmeti.
21-27 maýsym aralyǵynda Býrabaı kýrorttyq aımaǵynda Ázerbaıjan, Belarýs, Qytaı, Qyrǵyzstan, Reseı jáne Ózbekstan komandalarynyń qatysýymen XII halyqaralyq «Aıbyn» áskerı-patrıottyq jastar jıyny ótedi.
Jarystyń negizgi kezeńi Shoqan Ýálıhanov atyndaǵy áskerı kolledjdiń «Amandyq» polıgonynda ótedi. Sondaı-aq munda jıynǵa qatysýshylar ornalastyrylyp, jarys alańdary jabdyqtalady. Nysandardyń daıyndyǵyn tekserý maqsatynda polıgonǵa Qorǵanys mınıstrliginiń jumys toby bardy.
Qorǵanys vedomstvosynyń ókilderi is-sharany ótkizýge arnalǵan nysandardyń sapasy men daıyndyǵyn baǵalap, qajetti ınfraqurylymdy salý jáne jabdyqtaý jumystaryn júrgizip jatqan Qarýly kúshterdiń qurylymdyq bólimshelerimen úılestirý máselelerin talqylady.
— Bizdiń baǵalaýymyz boıynsha, jumystardyń 70 paıyzy oryndaldy. Áskerı-qoldanbaly jáne sporttyq jarystarǵa arnalǵan alańdar, saptyq plats jabdyqtaldy, sanıtarlyq aımaq abattandyryldy. Mádenı-demalys sharalaryn ótkizý úshin jazǵy amfıteatr salyndy, — dedi top jetekshisi, Qorǵanys mınıstrligi Tárbıe jáne ıdeologııalyq jumystar departamentiniń aǵa ofıtseri polkovnık Dáýlet Beısekov.
Qazir polıgonda shatyrly qalashyq pen ashanalardy jabdyqtaý jumystary aıaqtalýǵa jaqyn. Qonaqtardyń jaıly ári qaýipsiz bolýy úshin 40 oryndyq 66 shatyr jáne 20 oryndyq 8 shatyr ornatyldy. Qatysýshylardyń medıtsınalyq qyzmeti men qaýipsizdigin medıtsınalyq qyzmetter men áskerı polıtsııa bólimsheleri qamtamasyz etedi. Jarystarǵa tórelik etý úshin Qarýly kúshter áskerı bólimderiniń sport mamandary men nusqaýshylary tartyldy.
Іs-shara uıymdastyrýshylary jas patrıottar úshin mazmundy baǵdarlama daıyndaǵan. Áskerı-qoldanbaly jarystarmen qatar, zııatkerlik jáne shyǵarmashylyq baıqaýlar, sondaı-aq qyzyqty mádenı-tanymdyq is-sharalar uıymdastyrylady.
Daıyndyq jumystary josparly túrde júrgizilip jatyr. Halyqaralyq is-sharany joǵary deńgeıde ótkizý úshin barlyq qajetti sharalar qabyldanyp jatyr.
Budan buryn áskerı joǵary oqý oryndaryn úzdik bitirgen túlekterge áskerı ataq berý tártibi ózgergenin jazǵanbyz.
