Býrabaıda ormanǵa jaı túsip, órt tutandy
KÓKShETAÝ. QazAqparat – Aqmola oblysy Býrabaı aýdany aýmaǵynda orman órtendi, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, órt búgin saǵat 11:00 shamasynda Jasyl aýylynan 5 shaqyrym jerdegi «Býrabaı» memlekettik ulttyq tabıǵı parkine qarasty Jalaıyr orman sharýashylyǵy aýmaǵynda boldy.
Ot tutanýyna jaı túsýi sebep bolǵan.
Tilsiz jaýdy aýyzdyqtaýǵa «Býrabaı» memlekettik ulttyq tabıǵı parkine qarasty Jalaıyr orman sharýashylyǵynyń 12 jumysshysy, TJD jeke quramynan 15 qyzmetker tartyldy.
«Órt orman alqabynyń 0,08 gektaryn sharpydy. Saǵat 11:25 shamasynda órt aýyzdyqtaldy. Zardap shekender men mert bolǵandar joq», - deıdi Býrabaı aýdandyq TJB bastyǵy Qanat Babaev.
