Býrabaıda onnan astam eldiń jas ǵalymdary bas qosýda
Forýmǵa elimizden bólek, Armenııa, Belarýs, Vengrııa, Qytaı, Qyrǵyzstan, Lıtva, Reseı, Tájikstan, Túrkııa, Ózbekstan, Ýkraına jáne Frantsııa elderinen kelgen jas ǵalymdar qatysyp, ınnovatsııalyq tehnologııalar, ǵylymnyń damýy, jas ǵalymdarǵa jobalaryn iske asyrýǵa qalaı kómektesýge bolatyny jóninde pikir almasýda.
«Mundaı forýmdardyń jıi ótkizilip turǵany qajet. Ásirese, jas ǵalymdar úshin paıdasy zor. Jas ǵalymdar munda pikir almasyp qana qoımaı, oı bólisip, ǵylym salasyndaǵy túıtkildi máselelerdi, tyń taqyryptardy talqylaı alady. Sol jaǵynan alǵanda forýmnyń bereri mol», deıdi armenııalyq jas ǵalym Gevorg Vardanıan.
QR Tuńǵysh Prezıdenti – Elbasy Qory atqarýshy dırektorynyń orynbasary Igor Rogovtyń aıtýynsha, joba 3 jyl qatarynan júzege asyrylyp keledi. Osy aralyqta Qazaqstan men kórshi shetelderdegi joǵary oqý oryndarynyń arasyndaǵy iskerlik qarym-qatynas nyǵaıa túsken.
Forým «Jańa fýnktsıonaldyq materıaldar jáne tehnologııalar», «Qazaqstan Eýrazııanyń áleýmettik-saıası jáne tarıhı mádenı keńistiginde», «Marketıng pen logıstıkadaǵy Digital-tehnologııalar: «XXI ǵasyrdaǵy agroónerkásip kesheni: ǵylym jáne ınnovatsııalar», «Júıelik medıtsına – medıtsınanyń, densaýlyq saqtaýdyń jáne áleýmettik qamtamasyz etýdiń mýltıplıkatıvtik damýy» sektsııalary boıynsha ótýde.
Sondaı-aq, plenarlyq otyrys, dóńgelek ústelder, trenıng-áńgimelesý, forsaıtalańdar, netvorkıng-sessııalar, «Meniń tabys tarıhym» ýájdemelik kezdesýler, ınteraktıvtik semınarlar, ǵylym jáne bilimniń ártúrli baǵyttarynyń bazalyq trendterin nasıhattaý boıynsha trenıngter qarastyrylǵan.
Forýmnyń jumysyna QR Konstıtýtsııalyq Keńesiniń tóraǵasy Qaırat Mámı, Bilim jáne ǵylym mınıstri Ashat Aımaǵambetov, Indýstrııa jáne ınfraqurylymdyq damý mınıstri Roman Sklıar, Densaýlyq saqtaý mınıstri Eljan Birtanov, Aýyl sharýashylyǵy mınıstri Saparhan Omarov, Ádilet mınıstri Marat Beketaev, QR Memlekettik qyzmet isteri jónindegi agenttiginiń tóraıymy Anar Jaıylǵanova qatysady dep josparlanǵan.
Tamyzdyń 9-da forým jumysy qorytyndylanyp, qarar qabyldanady.
