Býrabaıda «Men Qazaqpyn» halyqaralyq balalar quryltaıy ótti
ASTANA. KAZINFORM - 9 shildede Aqmola oblysyndaǵy «Baldáýren» respýblıkalyq oqý-saýyqtyrý ortalyǵynda shetelde turatyn qandas balalarǵa arnalǵan erekshe shara – «Men Qazaqpyn» halyqaralyq balalar quryltaıy ótti. Mańyzdy jıynǵa álemniń jeti elinen kelgen 288 bala qatysty.
Bul shara, Dúnıejúzi qazaqtary qaýymdastyǵynyń uıymdastyrýymen, Oqý-aǵartý mınıstrliginiń qoldaýymen ótip otyr.
Quryltaıdyń negizgi maqsaty – sheteldegi qazaq balalarynyń tarıhı Otanyna degen súıispenshiligin arttyrý, ulttyq qundylyqtar men salt-dástúrlerdi tereńirek tanýyna múmkindik jasaý. Joba aıasynda qatysýshylar ulttyq-mádenı baǵdarlama negizinde arnaıy daıyndalǵan tanymdyq jáne tárbıelik is-sharalarǵa belsene qatysty.
- Búgin biz úshin ulystyń uly kúni, sebebi 300-ge jýyq qazaq balasy álemniń túkpir-túkpirinen qasıetti Býrabaı jerinde bas qosyp jatyr. Qazaq ózi kóp emes halyq. Bul joba - erekshe joba, keleshektiń jobasy. Balalardyń basyn qosyp, yntymaqty etip, keleshekte egemendi Qazaqstandy damytý úshin, elimizdiń jerimizdiń tutastyǵyn nyǵaıtý úshin, qazirgi eń negizgi másele jastardy tárbıelep, jastarǵa tilimizdi, dinimizdi dástúrimizdi ári qaraı jalǵastyryp, máńgilik el bolýǵa úles qosý, - deıdi Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov.
Sharaǵa joldama alǵan balalar óner, bilim, sport baǵyty boıynsha iriktelgen degen kil myqtylar.
- Ótinish bildirgen qandastardyń arasynan túrli salada jetistikke jetken, júldeger jáne daryndy balalar irikteldi. Sharanyń basty maqsaty – sheteldegi qazaq balalarynyń Atajurtymen baılanysyn nyǵaıtý. Qazaqtyń tili men dástúrin tereńirek tanyp, óz tamyryn sezinýge jol ashý. Bul olardyń bolashaqta Otanyna oralyp, eldiń damýyna úles qosýyna úlken múmkindik beredi, – dedi Dúnıejúzi qazaqtary qaýymdastyǵy tóraǵasynyń keńesshisi Qarlyǵash Bekpatshaqyzy.
Quryltaıda ulttyq qundylyqtardy dáripteýmen qatar, balalarǵa bıznes, zamanaýı kásipter men áleýmettik jeliniń múmkindikteri týraly mańyzdy dárister oqyldy. Sondaı-aq, bıylǵy baǵdarlamada etnomýzykalyq sabaqtar, ulttyq aspaptarmen tanysý, mýzeılerge barý jáne tarıhı jádigerlerdi zertteý sekildi baǵyttar qamtyldy.
Osyǵan deıin Býrabaıda shetelde turatyn qazaq balalaryna arnalǵan etnolager ashylǵany týraly jazdyq.