Býrabaıda «Men chempıon» jobasynyń fınaldyq oıyndary ótýde
KÓKShETAÝ. QazAqparat - Býrabaıda «Men chempıon» balalardyń sporttyq oıynynyń respýblıkalyq kezeńi ótýde,dep habarlaıdy QazAqparaty tilshisi.
Jobanyń tarıhynda tuńǵysh ret jeńimpaz kýbogy úshin Qazaqstannyń 13 oblysynan kelgen oqýshylarmen birge, Reseı jáne Ózbekstan elderiniń komandalary qatysýda.
«Aqmola oblysy ásem tabıǵatymen ǵana emes, tarıhı oryndary jáne tulǵalarymen tanymal. «Men chempıon» balalardyń sporttyq oıynynyń Býrabaı baýraıynda ótkizilýiniń tarıhı mańyzy zor. Barshańyzǵa sáttilik tileımin», - dedi Aqmola oblysy ákiminiń orynbasary Aına Mysyrálimova quttyqtaý sózinde.
«Men chempıon» jobasyna qatysýshylardy qoldaýǵa tanymal qazaqstandyq palýan Álem jáne Qazaqstan rekordshysy Sergeı Tsyrýlnıkov kelip, jankúıer bolýda.
«Men chempıon» jobasy qazaqstandyq mektep oqýshylarynyń qyzyǵýshylyǵyn arttyrýda. QR Bilim jáne ǵylym mınıstrligi bul oıyndy mekteptegi sporttyq sharalar tizilimine engizdi. Endi mine, joba halyqaralyq sıpatqa ıe bolýda.
Uıymdastyrýshylardyń aıtýynsha, bastapqyda «Men chempıon» jobasy Qazaqstandaǵy balalardyń sporttyq qozǵalysy retinde tanymal boldy. Qazir onyń shekarasy keńeıýde.
«Jobaǵa tuńǵysh ret Ózbekstan Respýblıkasynan bireý, Reseıden eki komanda qatysyp otyr. Onyń ishinde Omby oblysynan kelgen komandanyń qazaq etnomádenı ortalyq ókilderinen quralǵany qýantady. Bul jobanyń kópultty ekenin kórsetedi. Keleshekte joba halyqaralyq mártebesin alyp, Reseı jáne Ózbekstan elderiniń mektep oqýshylary arasynda qyzyǵýshylyǵy artady dep oılamyn. Jobanyń basty maqsaty, balalardyń sportpen shuǵyldanýyna jáne salaýatty ómir saltyn qalyptastyrýǵa baǵyttalǵan», - deıdi jobanyń jetekshisi ári avtory Evgenıı Sazanov.
Uıymdastyrýshylardyń aıtýynsha, «Men chempıon» jobasy tórt kún boıy ótedi. Jańa maýsymnyń jeńimpazdar qarashanyń 21-i kúni anyqtalady.
